रिपोर्टर्स क्लब ,बुटवल । राज्यले कलाकारिता क्षेत्रलाइ उचित सम्मान गर्न नसकेको कलाकारहरुले गुनासो गरेका छन् । बुटवलमा पांचौ अर्ना रनिङ्ग शिल्ड दोहोरी गीत प्रतियोगिता तथा सांस्कृतीक महोत्सवको सन्दर्भमा रिपोर्टर्स क्लव प्रदेश ५ मा आयोजित साक्षात्कारमा बोल्दै उनीहरुले नेपालका राज्य संचालकहरुले कलाकारिता क्षेत्रको बिकास र संरक्षणका लागि आश्वासन बाहेक कलाकारलाइ कुनै प्रकारको सम्मान र स्थान नदिएको गुनासो गरेका हुन् ।

राष्ट्रिय लोक तथा दोहोरी गीत प्रतिष्ठान नेपाल केन्द्रीय अध्यक्ष बद्री पंगेनीले नेपालको कलाकारहरु चर्चामा आउन की त कि मर्न पर्ने की बिबादमा पर्नै पर्ने ? भन्दै प्रश्न गरेका छन् । नेपालमा अहिले मिडियाहरु धेरै खुलेका छन् तर कलाकारको चर्चा गर्न,लेख्न कन्जुस्याङ भएको भन्दै दुखेसो सुनाए ।‘कलाकारका लागि पत्रकार घर छाउने खर जस्तै हो ,पहिले कम मिडिया थिए, अहिले धेरै छन् तर पहिलेको तुलनामा कलाकारको चर्चा र महत्व कम भयो ,हाम्रो बेवास्था भयो की ?’ उनले भने ।‘कि मर्न पर्ने की बिबादमा पर्नै पर्ने ?,हामी राज्यसंग पनि लडेकै छौं,हामी चाहन्थ्यौं राज्यको पांचौ अंग बनाइयोस् तर राज्यले अंग त दिएन,तर अब ढंग पुर्याओस् अंग चाहिएन ।’उनले बुटवलमा जारी अर्ना दोहोरीलाइ सफल बनाउन सबैको सहयोग र पहल हुनुपर्ने बताए ।

पशुपति शर्माको गीतबारे पंगेनीलाइ सोधिएको प्रश्नमा उनले अब त्यतातिर नजान हातै जोडेर आग्रह गरे ।राष्ट्रिय लोक तथा दोहोरी गीत प्रतिष्ठान नेपाल निर्बतमान अध्यक्ष चन्द्र शर्माले २०३९ बाट हेटौडाबाट शुरु भएको दोहोरी गीत प्रतियोगिता अहिले समयसापेक्ष परिष्कृत हुदै गएको बताए । बुटवलको महोत्सवमा ५६ टीम सहभागि भएको र आफुहरु कलाकार स्थापित गर्ने अभियान चलाइरहेको बताए । ‘२ लाख पुरस्कारको दोहोरी गीत चानेचुने बिषय होइन,सर्जकलाइ सम्मान,हौसला दिने काम सबैले गरौं ’ उनले भने । प्रतिष्ठानका प्रदेश ५ अध्यक्ष डिल्लीनारायण पाण्डेले नेपाली लोकदोहोरी क्षेत्रले संस्कार र संस्कृतीको संरक्षण गरिरहेको बताए ।

रिपोर्टर्स क्लब नेपाल ५ नम्बर प्रदेशका प्रमुख रामकुमार क्षेत्रीको अध्यक्षता तथा प्रदेश सदस्य तथा कपिल ज्ञवालीको संचालनमा भएको कार्यक्रममा राष्ट्रिय लोक तथा दोहोरी गीत प्रतिष्ठान नेपाल महासचिब सुवास केसी ,कोषाध्यक्ष दीपक खड्का ,केन्द्रिय सदस्य तथा संचार प्रमुख बैकुण्ठ महत,जिल्ला अध्यक्ष दीपक गरौजा मगर लगायतको उपस्थिती रहेको थियो ।

SHARE