Friday, April 19, 2019

नेपाल बन्दको प्रभाव बुटवलमा , यातायातका साधन पुर्ण रूपमा ठप्प, जनजीवन प्रभावित

बुटवल , २९ साउन । बिप्लव नेतृत्वको नेकपाले आह्वान गरेको मंगलबारको एक दिने नेपाल बन्दले जिल्लाको जनजीवन प्रभावित भएको छ । पार्टी प्रवक्ता खड्गबहादुर विश्वकर्मालाई प्रहरीले पक्राउ गरेको विरोधमा विप्लव नेतृत्वको नेपाल कम्युनिष्ट पार्टीले आव्हान गरेको नेपाल बन्दका कारण आज बिहानैदेखि यस क्षेत्रमा लामो तथा छोटो दूरीका कुनै पनि सवारीसाधन सञ्चालनमा आउन नसकेको जिल्ला प्रहरी कार्यालय रुपन्देहीले जनाएको छ ।

प्रहरीका अनुसार बुटवलबाट लामो दुरीका सवारीसाधन संचालनमा आउन सकेका छैनन् भने स्थानीय रुटका सवारीसाधन तथा साना र मोटरसाइकल लगायतका साधन फ़ाट्टफ़ुट्ट सामान्य रुपमा संचालनमा आएका छन् । सुरक्षाकर्मीले सुरक्षा दिइरहेकाले ढुक्क भएर गाडी चलाउन प्रहरीले आग्रह गरेको छ । घोषित एक दिने नेपाल बन्दका कारण सबैभन्दा बढी बालबालिका मारमा परेका छन् । उनीहरु अध्ययन नभएपछि बिद्यालयसम्म पुगेर फर्किन बाध्य परेका थिए ।

गृहमन्त्री बादलले सार्वजनिक गरे ८२ बुँदे गृह प्रशासन सुधार कार्ययोजना

गृहमन्त्री रामबहादुर थापा बादलले ८२ बुँदे गृह प्रशासन सुधार कार्य योजना सार्वजनिक गरेका छन् ।

मन्त्रालयमै सुरक्षा निकायका प्रमुखहरुसहित कार्यक्रमको आयोजना गरी गृहमन्त्री बादलले कार्ययोजना सार्वजनिक गरेका हुन् ।

गृहमन्त्रीले सार्वजनिक गरेको कार्ययोजनामा मुख्यगरी राष्ट्रिय एकताको संरक्षण, अपराध नियन्त्रण, भ्रष्टाचार, कालोबजारी नियन्त्रण र जनलाई क्विक सर्भिस डेलिभरी गर्न रहेका छन् ।

कार्ययोजनामा हरेक स्थानीय तहमा एउटा सुरक्षा पोष्ट स्थापना गर्ने, निजामति र प्रहरीतर्फको जनशक्ति व्यवस्थापन तथा सेवा प्रभावकारी बनाउने, सुरक्षा निकायलाई सूचना प्रविधिमैत्री बनाउने, विपद् व्यवस्थापनका लागि छुट्टै प्राधिकरण स्थापना गर्न पहल गर्ने र सुशासन प्रबर्द्धन गर्ने उल्लेख छ ।

सम्मानजनक एकता नभए युवाहरुले नमान्ने:वाइसीएल महासचिव सेर्पाली

बुटवलमा जारी वाइसीएल नेपालको ५ नम्बर प्रदेशको बैठक तथा प्रशिक्षणलाई सम्बोधन गर्ने क्रममा नेकपा एमाले संग हुने पार्टी एकता सम्मानजनक नभए वाइसीएलले अस्वीकार गर्ने संगठनका महासचिव सुवोधराज सेर्पालीले बताउनु भएको छ । उहाँले भन्नु भयो ५०/५० कै बराबरीमा एकता हुनुपर्ने पक्षमा वाइसीएल रहेको र त्यसैको लागी आफुहरु बैचारिक राजनैतिक रुपमा समेत बहस संघर्ष गर्दै लाग्नुपर्नेमा सबैले ध्यान दिन नेता जार्यकर्तालाई आव्हान गर्नुभयो ।

वाइसीएल सधैं जनजिविका, राष्ट्रिय स्वाधिनता र राष्ट्रियताको सवालमा लडदै आएको हुनाले राष्ट्रियताको एजेन्डामा कुनै पनि हालतमा अबिचलित भइ अघि बढ्न जिल्लाका पदाधिकारी भन्दा माथिका कार्यकर्तालाई निर्देशन महासचिव सेर्पालीले निर्देशन दिनुभयो । अब वाइसीएलको भुमिका बदलिएको छ हामी जनताको सुख दुखको साथी बनेर जनताको बिचमा जानुपर्ने कुरामा ध्यान केन्द्रीत गर्न सेर्पालीले जोड दिनु भयो ।

वाइसीएल ५ नम्बर प्रदेशको कार्यक्रममा पुर्व वाइसीएल केन्द्रीय सचिब निर्मल जि.सी., वाइसीएल प्रदेश फ्र्याक्सन इन्चार्ज रामप्रसाद बन्जाडे पार्टी केन्द्रीय सचिवालय सदस्य बामदेब क्षेत्रीले संबोधन गर्नु भएको छ । कार्यकरमा ५ नम्बर प्रदेशका सामाजिक बिकास मन्त्री सुदर्शन बरालले युवाहरुको माझमा प्रशिक्षण दिनु भएको थियो भने वाइसीएल फ्र्याक्सन इन्चार्ज तथा पार्टीको ५ नम्बर प्रदेश इन्चार्ज कमरेड मणि थापाले प्रशिक्षण दिने कार्यक्रम रहेको वाइसीएल नेपाल ५ नम्बर प्रदेश अध्यक्ष जितेन्द्र पुन “फेमस” ले जानकारी दिनुभयो ।

कुँवरवर्ती प्लाष्टिकमुक्त विद्यालय घोषणा

रुपन्देहीको तिलोत्तमा नगरपालिका वडा नं. ८ प्रदीपनगर स्थित कुँवरवर्ती इंलिस बोर्डिङ स्कूललाई प्लाष्टिकमुक्त घोषणा गरिएको छ । मंगलबार जुनियर रेडक्रस सर्कलले आयोजना गरेको कार्यक्रममा विद्यालयका प्राचार्य दीपक खनालले स्कूललाई प्लाष्टिकमुक्त घोषणा गर्नुभएको हो । तिलोत्तमा नगरपालिकाले सुरु गरेको अभियानलाई साथ दिँदै विद्यालयलाई प्लाष्टिकमुक्त घोषणा गरिएको प्राचार्य खनालले बताउनुभयो ।

तिलोत्तमा नगरपालिकाले वैशाख १ गतेदेखि प्लाष्टिक झोला, गिलास, प्लेट निषेधित अभियान सञ्चालन गरिरहेको छ । विद्यालयका प्राचार्य खनालले अब विद्यालय हाताभित्र प्लाष्टिकको प्रयोग नगरिने बताउनुभयो । त्यसअवसरमा प्राचार्य खनालले विद्यालयमा जङ्कफुड समेत प्रतिबन्ध लगाइएको जानकारी गराउनु भएको छ । कार्यक्रममा प्लाष्टिकको बेफाईदाका बारेमा विद्यार्थीलाई जानकारी गराउँदै घरमा समेत प्लाष्टिकका झोला प्रयोग नगर्न सुझाइएको सह–प्राचार्य भोजराज वोस्तीले जानकारी दिनुभयो ।

त्यसअवसरमा विद्यार्थी, शिक्षक, कर्मचारीलगायत सबैलाई प्लाष्टिकको झोलाको विकल्पमा जुट, अल्लोको झोला वा वैकल्पिक सामानको प्रयोग गर्न आग्रह गरिएको उहाँले बताउनुभयो । कार्यक्रममा विद्यालयका अर्का सहप्राचार्य चन्द्र अधिकारीले प्लाष्टिकको मानव स्वास्थ्यमा प्रतिकुल असर पार्ने बताउनुभयो । विद्यालयका प्राचार्य दीपक खनालको अध्यक्षता र सुशिल घिमिरेको सञ्चालनमा भएको कार्यक्रममा शिक्षक गोपाल पिसीलगायतले बोल्नुभएको थियो ।

१३ गते केपि ओली मर्चवार आउने, रुपन्देहीको मर्चवारमा बृहत आमसभा

नेकपा एमालेले यही कात्तिक १३ गते रुपन्देहीको मर्चवारमा बृहत आमसभा तथा पार्टी प्रवेश कार्यक्रम गर्ने भएको छ ।
प्रदेश र प्रतिनिधि सभा निर्वाचनलाई केन्द्रित गर्दै आयोजना गरिएको आमसभालाई पार्टी अध्यक्ष केपि शर्मा ओली, उपमहासचिव विष्णु पौडेललगायतका नेताहरुले संबोधन गर्ने एमाले रुपन्देहीले जनाएको छ ।
एमाले जिल्ला कमिटीको शुक्रबार बसेको १२ औं पूर्ण बैठकले मर्चवार क्षेत्रको मझगाँवामा आमसभाको आयोजन ागर्ने निर्णय गर्दै त्यसका लागि प्रचार प्रसार, स्वयंसेवक, मन्च व्यवस्थापनलगायतका उपसमितिहरु समेत निर्माण गरेको छ ।
बैठकपछि एमाले जिल्ला प्रचार विभाग प्रमुख तेजेन्द्र केसीद्वारा जारी विज्ञप्तीमा १३ गते हुने कार्यक्रमका लागि रुपन्देहीका सबै निर्वाचन क्षेत्रबाट पार्टी प्रवेश गर्नेहरुको नामावली संकलन गरिने उल्लेख छ ।
एमालेले यही कात्तिक १६ गते हुने प्रदेश र प्रतिनिधि सभा निर्वाचनको उम्मेदवारी दर्ताका लागि प्रदेश र प्रतिनिधि सभाका क्षेत्रीय समन्वय कमिटीका बैठकहरु राख्ने र आवश्यक तयारी गर्ने पनि निर्णय गरेको छ । विज्ञप्तीमा जिल्लामा बाम तथा राष्ट्रवादी शक्तिबीच तालमेलका लागि समन्वय गर्न पार्टीका केन्द्रीय सदस्य एवं रुपन्देही इन्चार्ज लिला गिरीको नेतृत्वमा सहइन्चार्ज र जिल्लाका पदाधिकारीले समन्वय गर्ने उल्लेख गरिएको छ ।
पार्टी जिल्ला कमिटी अध्यक्ष शिवराज सुवेदीको अध्यक्षतामा बसेको बैठकलाई संबोधन गर्दै एमाले केन्द्रीय सदस्य खिमलाल भट्टराई, एकराज विश्वकर्मा, प्रदेश कमिटी सदस्य गोपाल भट्टराई, राष्ट्रिय प्रतिनिधि परिषद सदस्य बाबुलाल यादव लगायतले समसामयिक राजनीतिक परिस्थिति र आगामी निर्वाचनका बारेमा प्रकाश पारेका थिए ।

के गर्न हुन्छ? के गर्न हुदैन मलमासमा ? शुरुहुँदै मलमास

ज्यो.चक्रपाणी डुम्रे ( शास्त्री) ।  यस वर्ष जेठ २ गतेदेखि ३० गतेसम्म मलमास परेको छ। मलमासलाई अधिकमास पनि भनिन्छ । गणना गर्दा ३२ महिना, १६ दिन, १ घण्टा र ३६ मिनेट पुगेपछि एक अधिकमासबाट अर्को अधिकमास पर्दछ । मलमासलाई पुरूषोत्तम मास पनि भनिन्छ ।

पौराणिक मान्यता अनुसार कुनै ग्रह वा देवी देवताले यो मासको अधिपत्य लिन नमानेपछि श्रीकृष्ण भगवान स्वयमले यसको स्वामित्व ग्रहण गरेको हुनाले यसलाई पुरुषोत्तममास भनिएको हो। अधिकमासमा भगवान नारायणको पूजा गरिने र पुरूषोत्तममाहात्म्य वा कथा सुन्ने र दान गर्ने परम्परा रहेको छ । अधिक मासमा कुनै पनि शुभ कर्महरू वा साईतहरू हुदैनन् । यसै हुनाले महिनाभरी कुनै पनि विवाहादि कार्य व्रतवन्ध लगायतका कुनै पनि कार्यहरू जुर्दैन। दैनिक रूपमा गर्दै ल्याईएका कर्महरू जस्तो नित्य पाठपूजा गर्नलाई चाहि कुनै छेकथुन हुदैन ।

 ” स्पष्टार्कसन्क्रान्तिविहिन चन्द्रो मासोsधिमास:

         क्षयमासकस्तु। द्विसन्क्रमस्तत्र बिभागयो:

          स्तस्तिथेर्हि मासौ प्रथमान्त्यसंज्ञौ।।

– मुहूर्तचिन्तामणि अर्थात् शुक्लपक्षको प्रतिपदाको आदिबाट अ्मावास्याको अन्यसम्म चन्द्रमासमा यदि सुर्य संक्रान्ति नभए त्यस चन्द्रमासलाई अधिकमास वा मलमास भनिन्छ । यदि एक चान्द्रमास भित्र स्पष्ट सुर्य संक्रान्ति दुई पटक पर्न गए त्यो क्षयमास हुन्छ।ज्योतिष शास्त्रका अनुसार ३६५ दिनको एक वर्ष वा १२ महिना हुन्छ । सुर्यको गतिअनुसार गणना गरिने मासलाई (महिना) सौरमास भनिन्छ भने, चन्द्रमासको गतिको आधारमा गणना गरिने मासलाई चन्द्रमास भनिन्छ ।

सामान्यतया सैरमासमा संक्रान्ति देखि मसान्तसम्ममा २९ दिनदेखि ३२ दिनसम्मको एक पहिना हुन्छ भने चन्द्रमासमा एक पूर्णिमादेखि अर्को पूर्णिमासम्म २९ दिन १२ घण्टा ४४ मिनेट र २४ सेकेन्डको एक चन्द्रमास हुन्छ । त्यस्तै सौरमासको गणनाअनुसार एक वर्षमा जम्मा ३६५ दिन हुछन् भने, चन्द्रमास अनुसार दिन गणना ३५४ दिन मात्र हुन्छ । सौरमासभन्दा चन्द्रमासको दिन गणनाअनुसार ११ दिन बढी वर्षमा हुने गर्दछ ।

यसरी गणना गर्दा ३२ महिना, १६ दिन, १ घण्टा र ३६ मिनेट पुगेपछि एक अधिकमासबाट अर्को अधिकमास पर्दछ वा आउँछ । यस क्रमले हरेक वर्षमा ११ दिनको फरकलाई जोड्दै जाँदा तीन वर्षमा एक महिना सौरमास भन्दा चन्द्रमास वढि हुन पुग्छ । मलमासमा आफुले गर्ने नित्य कर्म , जप ,ध्यान ,होम ,दान आदि काम भने गर्न हुन्छ त्यस्तै विशेष गरेर पुरुषोत्तम भगवानको स्थापना पूजा र पुरुषोत्तम महात्म्यको कथा श्रवण गरिन्छ । विभिन्न काम्य कर्म ,श्राद्ध तथा पितृकर्म, विवाह , व्रतवन्ध, चूडाकर्म ,सप्ताह शुभ मूर्हुतका कुनै पनि कर्म गर्नु हुदैन जस्तो गृह प्रवेश , नयाँ कार्यको थालनी , यात्रा, कार्यको शुभारम्भ गर्न अशुभ मानिन्छ। अधिक मासमा विवाह गरेमा गृह सुख हुदैन गर्भाधान गरेमा बच्चा रोगी जन्मन्छ ।

नव विवाहित दाम्पत्तीहरूकालागि अधिक मासमा अलग बस्नु राम्रो भान्ने मान्यता रहेको छ। बिवाहा भएको पहिलो वर्षमा आउने महिना आषाढमा घर वा पतिगृहमा बस्ता बुहारीले सासू पिर्ने, पहिलो क्षयमासमा बस्ता आफ्नै शरीरलाई पीडा गर्ने, पहिलो जेठमा बस्ता जेठाजु पिर्ने, पैलो पुसमा बस्ता ससुरालाई पिर्ने पहिलो अधिकमासमा बस्ता पतिलाई पिर्ने, पहिलो चैतमा पितृगृहमा वा माइत बस्ता आफ्नै बाउलाई पिर्ने कुरा मुहूर्तमार्तण्ड लगाएतका शास्त्रमा उल्लेख गरिएको छ ।

हाम्रा धर्मग्रन्थहरु हजारौं बर्ष पहिले ऋषि मुनिहरू द्वारा लेखिएका हुन्। हरेक समयको आआफ्नो मान्यता र विशेषता छ्न् ।मलमास वा अधिकमास त्यस्तो कुनै डरलाग्दो अशुभ समय भने चाहि होईन । वर्ष दिनलाई ठीकसँग मिलाउनकोलागि मलमास र क्षयमास आउने गर्दछ त्यसैले पुरुषोत्तममास वा मलमास कालो समय हो भन्ने कुरा गलत हो। यसका सकारात्मक पक्षलाई हेरौं, आफ्नो मन, बचन, कर्म शुद्द गरौँ, दान गरौँ, सहयोग गरौँ ।अस्तु।

उपराष्ट्रपति पुनले बुटवलमा भने-‘नेपालमा आर्थिक समृद्धिको युग शुरु भयो’

      उपराष्ट्रपति नन्दबहादुर पुनले नेपालमा आर्थिक समृद्धिको युग शुरु भएको बताएका छन् । राजनीतिक संक्रमण अन्त्य भएको भन्दै उनले देशमा स्थायीत्व आरम्भ भएको दाबि गरे । आजदेखि बुटवलमा शुरु भएको राष्ट्रिय औद्योगिक प्रदर्शनीको उद्घाटन गर्दै पुनले समृद्ध नेपाल निर्माणको संकल्प पूरा गर्न तीन तहको तह निर्माण गरिएको बताए । ‘संघ,प्रदेश र स्थानीयतह बनाइएको छ ,अब केहि समयमै संघ र प्रदेशमा पनि सरकार बन्नेछन्’ पुनले भने—‘अब समृद्धिका लागि प्रतिस्प्रर्धा गर्नुपर्छ ।’

उनले नेपालमा लगानी मैत्री युग शुरु भएको भन्दै सरकारलाइ निर्यात बढाउने नीति बनाउन सुझाब समेत दिए । नेपाल पूर्ण लगानी मैत्री बनिसकेको भन्दै ढुक्क भएर लगानी बढाउन पनि आग्रह गरे । स्वदेशी उत्पादनको प्रयोग गर्नुपर्ने भन्दै उनले औद्योेगिक नीति बदल्नुपर्ने बेला आएको उल्लेख गरे । ‘पुरानो नीति सच्चाउनुपर्छ,निर्यातमुखी नीति बनाउन जरुरी छ’,पुनको भनाइ छ । ‘आर्थिक समृद्धिका लागि आर्थिक क्रान्ति जरुरी छ, तर यो त्यत्ति सजिलो अवश्य छैन । साझा संकल्प, दृढ् ईच्छाशक्ति र लगनशीलता भयो भने त्यत्ति अप्ठ्यारो पनि छैन – उनले भने । उनले स्थानीय,प्रदेश र संघको निर्बाचनमा सहभागिता जनाइ मताधिकार प्रयोग गरेकोमा नेपाली जनतालाइ धन्यबाद र बधाई समेत दिए ।

‘प्रदेश राजधानीको हकमा बुटवल बाहेक निर्णय गरिए आन्दोलन चर्काउछौं : बिष्णु पौडेल’

कार्यक्रममा बोल्दै पूर्व अर्थमन्त्री तथा रुपन्देही २ बाट निर्बाचित सँंसद बिष्णु पौडेलले रुपन्देहीलाइ औद्योगिक बिकासको केन्द्र बनाउनुपर्ने बताए । उनले प्रदेश न ५ को राजधानी बुटवल नै बनाउनुपर्ने भन्दै अन्यथा भए प्रदेश अखण्ड लुम्बिनीको जस्तै आन्दोलन चर्किने चेताबनी दिए । पौडेलले भने ‘बुटवल बाहेक अन्यथा निर्णय हुने सुनिएको छ,यसो भए हामी सडकमा उत्रिन्छौं ।’

बुटवल मण्डपमा १४औं औद्योगिक प्रदर्शनी शुरु

समृद्ध नेपाल निर्माणको आधार, स्वदेशी उद्यमशिलताको बिस्तार भन्ने मुल नाराकासाथ आजदेखि बुटवलमा राष्ट्रिय औद्योगिक प्रदर्शनी शुरु भएको छ । आयोजक रुपन्देही उद्योग संघको आयोजनामा शुरु भएको स्वदेशी उत्पादनको मात्र प्रदर्शनी बिहिबार उपराष्ट्रपति नन्दबहादुर पुनले उद्घाटन गरे । रुपन्देही उद्योग संघ र नेपाल उद्योग परिसंघको संयुक्त आयोजनामा संचालन हुने प्रदर्शनीमा ६ लाख बढी दर्शकले अवलोकन गर्ने र ५ करोड बढीको ब्यापार गर्ने आयोजक संस्थाका अध्यक्ष दिनेशराज रेग्मीले बताए ।

सो अबसरमा प्रदेससभा सदस्यहरु भोजप्रसाद श्रेष्ठ,दधिराम शर्मा,रुपन्देहीका प्रमुख जिल्ला अधिकारी हरिप्रसाद मैनाली ,जिससका प्रमुख एकराज बिक, नेपाल उद्योग परिसंघका अध्यक्ष हरिभक्त शर्मा,महासचिब माधव पौडेल,पूर्व अध्यक्ष एजाज आलम,नगर प्रमुख शिबराज सुबेदी,काग्रेस नगर सभापति खेलराज पाण्डेय,पत्रकार महासंघका अध्यक्ष यानेन्द्र जिसि,मेला सहसंयोजक गणेश प्रसाद अधिकारी,सहसंयोजक महेश थैव लगायतले बोलेका थिए ।

नवज्योतिले शुरु गर्यो ५ दिने नेतृत्व बिकाश र उद्घोषण तालिम

  मोहन न्यौपाने , बैशाख २५ । नव ज्योति क्लब तिलोत्तमा -१ शंकरनगरको आयोजना तथा तिलोत्तमा नगरपालिका वार्ड न १ को आर्थिक सहयोगमा युवा हरुको सशक्तिकरणको लागि ५ दिने नेतृत्व बिकाश तथा उद्घोषण तालिम शुरु भएको छ ।

क्लबका अध्यक्ष चन्द्रकान्त पाण्डेको अध्यक्षता तथा तिलोत्तमा वार्ड २ का अध्यक्ष दधिराम गौतमकोको प्रमुख आतिथ्यतामा सम्पन्न तालिम उद्घाटनमा बोल्दै प्रमुख अतिथि गौतमले युवा सशक्तिकरणका लागि नगरपालिका मार्फत वार्ड तहले कुनैपनि कसर बाकि नराख्ने बताए । उनले युवाहरुलाई आफुलाई निर्धक्क बोल्न सक्ने बनाउन र आगामी दिनमा नेतृत्व र उद्घोषण कलामा अगाडी बढ्न सुझाब दिनुभयो ।

उनले यस्ता तालिमले समाजमा भएका कुलत र बिकृतिलाइ हटाउन र सबैलाई जागरुक बनाउनुका साथै आफ्नो हक अधिकारको लागि अघि बढ्न सक्ने बनाउने र परेको बेला ढुक्क भएर बोल्न तथा आगामी दिनमा जस्तोसुकै कार्यक्रम चलाउन सक्ने बताए । त्यस्तै अतिथिको तर्फबाट बोल्दै बिशिस्ट अतिथि समाजसेवी क्याप्टेन प्रेम बहादुर भण्डारीले युवाहरुको चेतना स्तर माथि लैजान र समुदायमा पहिचान बनाउन तथा बोल्नेकलामा उत्कृस्ट बन्न यस्तो तालिमको जो कोहीलाई आवश्यक हुने बताए ।

यस्तै अर्का अतिथि पुर्ब जिल्ला शिक्षा अधिकारि टेक बहादुर थापाले युवाहरुको हक हित र अधिकार सुनिश्चितताको लागि शसक्तिकरणका लागि नेतृत्व निकाश तथा उद्घोषण तालिमको आवश्यक रहेको बताए। कार्यक्रममा क्लबका सल्लाहकार लोकनाथ पाण्डे, शंकरनगर दुर्गादत्त माविका अध्यक्ष उमानाथ कंडेल, शंकरनगर सामुदायिक वन उपभोक्ता समूहका अध्यक्ष राम गिरी, समाजसेवी टेक बहादुर थापाले क्लबलाई अघिबढाउन सदस्यहरुलाई समेत तालिम आवश्यक रहेको बताए । सो तालिममा नेतृत्व बिकाशको लागि सरोज कंडेल , मिडियाको तर्फबाट उद्घोषण तालिम मोहन न्यौपाने, सुमन श्रेष्ठ , खेमराज रेग्मी लगायतले प्रशिक्षण दिने र तालिममा ७० जना युवा तथा महिलाहरुको सहभागिता रहेको तालिमका संयोजक सन्दिप भट्टराईले जानकारी दिए ।
तालिम उद्घाटनको संचालन गर्दै संयोजक सन्दिप भट्टराईले युवाहरु तथा महिलाको बोल्न सक्ने कलाको बिकाश र समाजमा जिम्मेबारी बन्दै नेतृत्व लिन सक्ने बन्न तालिमले अग्रणी भूमिका खेल्ने बताए । तालिम यहि बैशाख २९ गतेसम्म चल्ने र समापनको दिन बृहत रक्तदानको आयोजना गरिएको समेत आयोजकले बताएको छ ।

आयातमुखी अर्थतन्त्रबाट बाहिर निस्कने छटपटी निजी क्षेत्रलाई साना कलकारखानामा लगानी गर्न प्रोत्साहन

अर्थमन्त्री डा.युवराज खतिवडाले स्वेतपत्र जारी गर्दै देशलाई आयतमुखी अर्थतन्त्रबाट बाहिर निस्कन प्रयास गर्ने बताएका छन्। श्वेतपत्र जारी गर्दै उनले आगामी दिनमा सामान आयातको करले देश चलाउने अवस्थाबाट अर्थतन्त्रलाई माथि उठाउन राष्ट्रिय उत्पादन बढाउन लगानी केन्द्रित गर्ने जानकारी दिए।
सरकार बैदेशिक लगानी ठूला आयोजना केन्द्रित रहने उनले स्पष्ट संकेत गरेका छन्। नेपालका निजी क्षत्रेले साना उत्पादनमुक उद्योग कलकारखानामा लगानी गर्नु पर्ने डा.खतिवडाको भनाइ थियो। नेपालले नेपालको अन्तरिक उत्पादनमा केन्द्रित गरेर अघि बढ्नु पर्नेमा उनले जोड दिए। आन्तरिक उत्पादन बढाउन सरकारले वैदेशिक ऋण लिनसक्ने उनले बताए। ‘त्यसका लागि निजी क्षेत्रले समेत आफ्नो स्तरबाट विदेशी लगानी ल्याउनुपर्छ’, डा.खतिवडाले भने, ‘स–सना परियोजनामा वैदेशिक सहयोग लिँदैनौं।’
राष्ट्रियहितभन्दा लगानीकर्ताका चाहनामा आउने योजनाहरुमा सरकारले ध्यान दिने उनले जनाए। ‘विदेशीको योजनाभन्दा पनि हाम्रो योजनामा पैसा भित्र्याउनुपर्छ’, उनले भने। श्वेतपत्र जारी गरेपछि अर्थमन्त्रालयमा अयोजित पत्रकार सम्मेलनमा अर्थमन्त्री डा. खतिवडाले उदारीकरणका नाममा भन्सार दरबन्दीहरु घटाइएको तर आन्तरिक राजश्वको श्रोत खोज्न भने असफल भएको सुनाए। कर प्रशासनले राजश्वको नयाँ स्रोत खोज्न कुनै कसरत नगरेको आरोप उनले लगाए।
सरकारले मूल्य अभिवृद्धि कर (भ्याट)को कार्यान्वयन पक्ष प्रभावकारी हुन नसकेको उनले स्वीकार गरे। भ्याटको सिद्धान्त र अभ्यास विपरीत मनोगत रुपमा कतिपय वस्तुहरुको बिक्रीमा संकलन हुने कर व्यवसायीलाई फिर्ता दिने व्यवस्थाले वार्षिक करिब ५ अर्बभन्दा बढीको राजश्व गुमाउनु परेको डा. खतिवडाको भनाइ थियो।

देशभक्तले उचाल्यो शहीद स्मृति कपको उपाधि

१० फागुन, बुटवल । रुपन्देहीको बुटवलमा सम्पन्न चौथौ शहीद स्मृति कप खुल्ला नकआउट फुटबल प्रतियोगिता २०७५ को उपाधि देशभक्त युवा क्लब नवलपरासीले हात पारेको छ । शुक्रबार भएको फाइनलमा सिद्धार्थ क्लब चपरहट्टीलाई २-१ गोल अन्तरले पराजित गर्दै देशभक्तले उपाधि चुमेको हो । उपाधिसँगै देशभक्तले नगद एक लाख एक हजार, मेडल, कपर प्रमाणपत्र प्राप्त गरेको छ ।

उपविजेता सिद्धार्थले नगद ५० हजार पाँचसय सहित मेडल प्रमाणपत्रमा चित्त बुझाएको छ । प्रतियोगितामा देशभक्तका वीरेन्द्र सारु उत्कृष्ट गोलरक्षक, बिनोद केवट सर्वाधिक गोलकर्ता र सिद्धार्थका अनिष गुरुङ्ग सर्वोत्कृष्ट खेलाडी घोषित हुँदै मेडल र ट्रफीबाट पुरस्कृत भएका छन । शहीद स्मृति खेलकुद क्लबको आयोजना तथा मदन भण्डारी स्र्पोटस एकेडेमीको सहकार्यमा रामनगर खेलमैदानमा भएको खेलमा देशभक्तको जितमा बिनोद केवलले खेलको १४ र २९ औ मिनेटमा गोल गरेको थिए ।

सिद्धार्थका आशिष थापाले खेलको २५औं मिनेटमा सान्त्वना गोल गरेका थिए । फागुन १ गतेबाट सुुरु भएको प्रतियोगितामा १० टिम सहभागी थिए । समापन खेल प्रदेश न. ५ का उद्योग पर्यटन बन तथा बाताबरण मन्त्रि लिला गिरीको प्रमुख आतिथ्यतामा सम्पन्न भएको थियो  ।

RECENT POSTS