Wednesday, May 22, 2019

बुटवलमा जारी औद्योगिक प्रदर्शनी आज समापन हुँदै

१४ औं राष्ट्रिय औद्योगिक प्रदर्शनी सकिनै लाग्दा दर्शकको अत्याधिक चाँप
आज (मंगलबार) प्रदर्शनीको समापन
शुशिलले चुमे ज्याक्वर प्रदर्शनी आइडल सिजन ५ को उपाधी

बुटवल, पुस १८ ।
रुपन्देही उद्योग संघको आयोजनामा बुटवलमा सञ्चालित १४ औं राष्ट्रिय औद्योगिक प्रदर्शनी कृषि, प्रविधि तथा पर्यटन महोत्सव–२०७४ को आज (मंगलबार) समापन हुने भएको छ । प्रदर्शनीको आज (मंगलबार) दिउँसो २ बजे नेकपा एमालेका केन्द्रीय सदस्य तथा प्रदेश सांसद लिला गिरीको प्रमुख आतिथ्यतामा समापन कार्यक्रम राखिएको छ । प्रदर्शनीको सोमबारसम्म ६ लाख दर्शकले अवलोकन गरेको र २० करोड रूपैयाँको कारोवार भएको प्रदर्शनी मूल आयोजक समितिका संयोजक दिनेशराज रेग्मीले जानकारी दिनु भएको छ । आयोजकले सोचेभन्दा प्रदर्शनी तथा महोत्सव सफल भएको रेग्मीले बताउनु भयो ।
प्रदर्शनी सकिन १ दिन मात्र बाँकी रहँदा सोमबार पनि प्रदर्शनी अवलोकन गर्ने दर्शकको अत्यधिक चाँप बढेको सचिवालयले जनाएको छ । प्रदर्शनीको कृषि र प्रविधिका स्टलहरूमा दर्शकले चासोपूर्वक अवलोकन गर्नुका साथै स्वरोजगार बन्नेतर्पm चासो राखेका छन् । स्टलधनीहरूले समेत प्रदर्शनीमा आफूहरू पूर्ण सन्तुष्ट रहेको बताएका छन् ।
बुटवलमा हालसम्म सम्पन्न भएका प्रदर्शनी, मेला एवं महोत्सवहरुमध्ये अहिलेको प्रदर्शनी सबै तर्फबाट उत्कृष्ट रहेको प्रदर्शनी प्रबन्धक यादव भण्डारीले जानकारी दिनुभयो । समापन समारोहमा उत्कृष्ट स्टल एवं उद्योगी, सहयोगी संघसस्था लगायत विभिन्न व्यक्तिहरूलाई सम्मान गरिने कार्यक्रम समेत तय गरिएको छ ।
सांस्कृतिक कार्यक्रम
प्रदर्शनीको मनोरञ्जनात्मक कार्यक्रम सोमबार विरेन्द्र अग्रहरी, बसन्त श्रेष्ठ, नेपाल आइडल टप ५ सुजाता पाण्डे, आधुनीक पप गायक सुदन बास्कोटा, लोकदोहोरी गायक संजय सौगात, राज केसी र पवित्रा थापाको नृत्य, तेस्रो लिंगी नृत्यङ्गा विनीता शाही, अवन्तिका घर्तीको लगायतको प्रस्तुती रहको थियो ।
यता ज्याक्वर प्रदर्शनी आइडल–२०७४ (सिजन ५) प्रतियोगिताको उपाधी शुशिल आचार्यले चुमेका छन् । उनले टप ३ प्रतिस्पर्धी निरज थापा र आकास झा लाई पछाडि पार्दै प्रदर्शनी आइडल सिजन फाइभको उपाधि कब्जा गर्न सफल भएका हुन । उपाधी बिजेता शुशिल आचार्यले नगद पुरस्कार रु. १ लाख ११ हजार १ सय ११ सहित विभिन्न पुरस्कारहरु प्राप्त गरेको छन् । आइडलको दोस्रो उपाधी निरज थापा ले प्राप्त गरेका छन् । द्वितीय उपाधीको पुरस्कार रु. ५५ हजार ५ सय ५५ रहेको छ भने आकास झा ले रु. ३३ हजार ३ सय ३३ पुरस्कार रहेको तेस्रो उपाधी प्राप्त गरेका छन् । ज्याक्वर प्रदर्शनी आइडल–२०७४ (सिजन ५) को फाइनल कार्यक्रममा नेपालका चर्चित कलाकार र अभिनेता सुनिल थापाको विशेष आतिथ्यता र प्रस्तुती रहेको थियो कार्यक्रममा प्रदर्शनी मूल आयोजक समितिका संयोजक एवं रुपन्देही उद्योग संघका अध्यक्ष दिनेशराज रेग्मी, ज्याक्वर इण्डष्ट्रिजका म्यानेजिङ्ग डाइरेक्टर महेश थैव, प्रदर्शनी आइडलका संयोजक तिलक नेपाली लगायतले आयोजनाको ऐतिहासिक पृष्ठभूमी र आयोजनाको महत्वबारेमा धारणा राख्नु भएको थियो । प्रदर्शनी आइडलको संचालन कुसल कार्यक्रम संचालक गोपाल अधिकारीले गर्नु भएको थियो ।
त्यस्तै सोमबार नै विरेन्द्र अग्रहरी, बसन्त श्रेष्ठ, नेपाल आइडल टप ५ सुजाता पाण्डे, आधुनिक पप गायक सुदन बास्कोटा, लोकदोहोरी गायक सञ्जय सौगात, राज केसी र पवित्रा थापाको नृत्य, तेस्रो लिंगी नृत्यङ्गा विनीता शाही र अवन्तिका घर्तीलगायतको प्रस्तुति रहेको थियो ।
उद्योग संघले उपत्यका बाहिर पहिलो पटक २०४५ सालमा बुटवलमा प्रदर्शनीको आयोजना गरेको हो । जारी प्रदर्शनीमा स्वदेशी उत्पादनको प्रदर्शनी, प्रवद्र्धन तथा बजारीकरण, प्रविधि प्रदर्शन, पर्यटन प्रवद्र्धन एवं सूचना केन्द्र, विभिन्न लोक सांस्कृतिक प्रदर्शन, दोहोरी गीत, आर.सि.आई. ट्यालेण्ट हन्ट प्रतियोगिता, प्रथम आर.सि.आई. कप भलिबल प्रतियोगिता लोकनृत्य प्रतियोगिता, प्रदर्शनी आइडल, औद्योगिक सूचना केन्द्रको सञ्चालन, आकर्षक रेष्टुरेन्टहरू र कृषि ग्राम सञ्चालन भएका छन् ।

नेशनल माइक्रोफाइनान्स बित्तिय सँस्था लि. को शाखा कार्यालय भलवारीमा

पौष १७, सोमबार
तिलोत्तमा
नेशनल माइक्रोफाइनान्स बित्तिय सँस्था लिमिटेडको ३५ औं शाखा कार्यालय तिलोत्तमा ७, भलवारीमा स्थापना गरिएको छ । देशका बिभिन्न ३२ जिल्लाहरुमा शाखा कार्यालय स्थापना गरेको सो बित्तिय सस्थाले रुपन्देहीमा भने आफ्नो पहिलो शाखा कार्यालय भलवारीमा स्थापना गरेको हो । सोमबार सम्पन्न उद्घाटन कार्यक्रममा बोल्दै कार्यक्रमका प्रमुख अतिथि एंव सस्थाका अध्यक्ष केशव प्रसाद आचार्यले, ३ बर्ष अघि साढे ७ करोड लगानीबाट शुरु गरिएको माइक्रोफाइनान्सले ३ बर्षकै अवधिमा आफ्नो लगानी बढाएर १२ करोडको हाराहारीमा पुर्याउनु आफैमा चुनौतीपूर्ण र अथक परिश्रमको नतिजा भएको बताए । महिला मैत्री सो फाइनान्सले ५ लाखसम्म बिनाधितो ऋण दिन सकिने गरि ब्यवस्था मिलाएको बताउदै आचार्यले नेशनल माइक्रोफाइनान्सले महिला समुह गठन गरि उनीहरुकै पहलमा सदस्य बनाउने, ऋण लगानी र असुली गर्ने गरेको समेत सो अवसरमा उनले जानकारी दिए । उद्घाटन कार्यक्रममा  अतिथिहरु तिलोत्तमा वडा न ७ का अध्यक्ष दुर्गा प्रसाद पाण्डे, स्वाभिमान माइक्रोफाइनान्सका कार्यकारी अधिकृत कृष्ण राज चौधरी, समाजसेवी देवानन्द पाण्डे, कृष्ण प्रसाद आचार्य, तारा चौधरी, शाखा प्रबन्धक बिनोद पाण्डे लगायतले मन्तब्य दिदै, महिलाहरु हरेक तहमा अब्बल र अगाडी बढेर काम गर्न सक्षम हुदा हुदै पनि बिबिध कारणवश पछाडी  परेकाहरुलाई यो सस्थाले समबोधन गर्नेमा बिस्वस्त रहेको बताएका थिए ।  कार्यक्रमको सन्चालन बरिष्ठ प्रबन्धक बिजय घिमिरेले गरेका थिए ।

औद्योगिक प्रदर्शनी–२०७४ को समापन मंगलवार हुने/आज प्रदर्शनी आइडलको फाइनल

तिलोत्तमा सिटी, पुष १७
रुपन्देही उद्योग संघको आयोजनामा बुटवलमा सञ्चालित १४ औं राष्ट्रिय औद्योगिक प्रदर्शनी कृषि, प्रविधि तथा पर्यटन महोत्सव–२०७४ को समापन मंगलवार हुने भएको छ । प्रदर्शनी निर्देशन तथा कार्यान्वयन समितिको आइतवार बुटवल मण्डपमा बसेको बैठकले प्रदर्शनी पूर्व निधारित मिति मै समापन गर्ने निर्णय गरेको छ । प्रदर्शनी सकिन २ दिन मात्र बाकि रहेको छ ।
‘समृद्ध नेपाल निर्माणको आधार, स्वदेशी उद्यमशीलताको विस्तार’ भन्ने मूल नाराका साथ स्वदेशी उत्पादनको प्रदर्शन र बजारीकरण गर्ने उद्देश्यका साथ नेपाल उद्योग परिसंघको सहकार्यमा आयोजना गरिएको प्रदर्शनीको ११ औं दिन आइतवारसम्म ५ लाख २५ हजार दर्शकहरुले अवलोकन गरेको सचिवालयले जनाएको छ । यस अवधिमा करिव १६ करोडको आर्थिक कारोवार समेत भएको अनुमान गरिएको छ । प्रदर्शनीको शनिवार मात्र एकै दिन करिव डेढ लाख दर्शकले अवलोकन गरेका थिए । आइतवार ४५ हजार दर्शकहरु प्रदर्शनी अवलोकन गर्न आएको जनाइएको छ । प्रदर्शनीको निर्धारित आयोजना समयावधि सकिने दिन नजिकिदै जादा मण्डपमा आर्थिक कारोवार बढेको स्टलधनीहरुले जनाएका छन् । अवलोकनकर्ताहरुले वजारमा भन्दा सस्तो मुल्यमा प्रदर्शनीस्थलमा दैनिक उपभोग्य बस्तुहरु खरिद गर्ने गरेको उनीहरुले बताएका छन् ।
कृषि गोष्ठी सम्पन्न
प्रदर्शनीका क्रममा आइतवार प्रदर्शनी स्थलमा नेपाली कृषि, वर्तमान र भविष्य विषयक एक दिवसीय गोष्ठी सम्पन्न गरिएको छ । गोष्ठीमा कृषि मन्त्रालयका उपसचिव डा.मणिरत्न अर्यालले कार्यपत्र प्रस्तुत गर्नु भएको थियो । कार्यक्रममा रुपन्देहीमा कृषिको विकासका लागि सिचाई सुविधा उपलब्धता हुन नसक्नु चुनौती भएको धारणा राख्दै कृषिको व्यवसायिकरण तथा विविधिकरणका लागि गुणस्तरीय कृषि सामग्रीको आपूर्तिको सुनिश्चितता, आवश्यक पूर्वाधारहरुको पर्याप्त मात्रमा विकास तथा कृषि पेशालाई सम्मानित र मर्यादित पेशाका रुपमा हेर्नु पर्ने सुझाव दिइएको थियो । बक्ताहरुले राज्यले कृषि क्षेत्रमा संलग्न साना कृषकहरुलाई दिने सुविधा सहज प्रदान गर्न नसकेको र त्यसले कृषि पेशामा संलग्नहरु निराश बन्नु परेको गुनासो समेत गरेका थिए ।
उनीहरुले छिमेकी मुलुकमा कृषिमा निकै बढी अनुदान प्रदान गरिएको अवस्थामा नेपालका कृषकहरुले त्यसमा प्रतिष्पर्धा गर्न कठिन रहेको, कृषि जमिन खण्डिकरण प्रकृया बढेको र श्रमिक पलायन धेरै रहेको हुदा गम्भिर बन्न आग्रह गरेका थिए ।
कार्यक्रममा कार्यपत्र प्रस्तुत गर्दै डा. अर्यालले गुणस्तर र परिणामलाई जोड दिई उत्पादन प्रणालीलाई अगाडि लान सकेमा रुपन्देही जिल्लालाई कृषि उपजको निर्यात जोन बनाउन सकिने दावी गर्नु भयो । उहाले स्थानिय कृषि जन्य उद्योगमा कच्चा पदार्थको आपूर्तिको सुदृटिकरण नै औद्योगिकीकरणको बाटो भएको धारणा राख्नु भएको थियो ।
कार्यपत्रमा व्यवसायिक तरकारी खेती, माछा तथा पशुपालनको प्रर्वद्धन भएमा आयआर्जन बृद्धि गर्न सकिने हुदा युवाको आकर्षण बढाउन मद्दत मिल्ने उल्लेख छ । हाम्रो जस्तो मुलुकमा आयात प्रतिस्थापन गर्ने र उद्योगको विस्तार गर्ने कुरामा सबैका ध्यान जानु जरुरी रहेको कुरा कार्यपत्रमा उल्लेख छ ।
कार्यक्रमका प्रमुख अतिथि जिल्ला कृषि विकास कार्यालयका प्रमुख भोजराज सापकोटाले रुपन्देहीमा कृषिको वर्तमान अवस्था र अवसरहरुको बारेमा धारणा राख्दै रुपन्देही नेपाल कै कृषि क्षेत्रको नेतृत्व गर्न सक्ने क्षमता बोकेको जिल्ला भएको बताउनु भयो ।
रुपन्देही उद्योग संघका अध्यक्ष दिनेशराज रेग्मीले कृषि क्षेत्रलाई पनि उद्योगको रुपमा विकास गर्न सकेमा मात्र देशको आर्थिक विकास अगाडी बढ्ने हुदा त्यसमा राज्य र नीजि क्षेत्र एक हुदै कृषिका पकेट क्षेत्र घोषणा गरि लगानी गर्ने बातावरण बनाउन आवहान गर्नु भयो ।
कार्यक्रममा स्वागत गोष्ठि संयोजक माया खनाल र सञ्चालन मुल आयोजक समितिका सदस्य कृष्ण पराजुलीले गर्नु भएको थियो । कार्यक्रममा बुटवल उद्योग बाणिज्य संघका अध्यक्ष खेमबहादुर हमाल, वेनुराम प्रधान, लालबहादुर थापा लगायत बोल्नु भएको थियो ।
सांस्कृतिक कार्यक्रम
प्रदर्शनीको मनोरञ्जनात्मक कार्यक्रम अन्तरगतका केही प्रतियोगिताहरुको छनौट चरण अन्तिममा पुगेका छन् भने केहीका छनौटहरु सकिएका छन् । प्रदर्शनीमा राखिएको दोहोरी गित प्रतियोगिताको फाइनल आइतवार सम्पन्न भएको छ । फाइनलमा राष्ट्रिय लोक दोहोरी गित प्रतिष्ठान स्याङ्जा ए र राष्ट्रिय लोक दोहोरी गित प्रतिष्ठान स्याङ्जा वी वीच प्रतिष्पर्धा भएको थियो, जसमा राष्ट्रिय लोक दोहोरी गित प्रतिष्ठान स्याङ्जा ए विजेता बन्न सफल भयो ।
यता ज्याकोर प्रदर्शनी आइडल–२०७४ प्रतियोगिताको फिनाले सोमवार हुदैछ । प्रतियोगिता अन्तरगत आइतवार अन्तिम टप ३ गायक छनौट भएका छन् । टप ४ अन्तरगत भएको प्रस्तुतीबाट आइतवार भोटिङका आधारमा एक जना प्रतियोगिताबाट बाहिरिएका छन् ।

प्रतियोगितामा टप ४ सम्म पुगेका गायक अभिषेक विक भोटिङका आधारमा प्रतियोगिताबाट बाहिरिएपछि फिनालेमा टप ३ को प्रस्तुति रहने छ । प्रतियोगिताको फिनालेमा निरज थापा, शुशिल आचार्य र आकाश झाको प्रतिष्पर्धा रहेको छ । ज्याकोर प्रदर्शनी आइडल–२०७४ को फाइनल कार्यक्रममा नेपालका चर्चित कलाकार, अभिनेता सुनिल थापाको उपश्थिति रहने जनाइएको छ ।
स्थानीय तथा राष्ट्रिय कलाकारहरुको एकल प्रस्तुती अन्तरगत आइतवार चर्चित गायक बैकुण्ठ महत, चर्चित गायिका मञ्जु पौडेल, आधुनिक गायक रुपक डोटेल, दोहोरी गायक पुरुषोत्तम गैरे, गायक शिव खनाल, हास्य कलाकार पुरुषोत्तम भण्डारी (पुर्खे बा) तथा क्यारिकेचर दिपेन्द्र वली लगायतको प्रस्तति रहेको थियो । सोमवार विरेन्द्र अग्रहरी, बसन्त श्रेष्ठ, नेपाल आइडल टप ५ सुजाता पाण्डे, आधुनीक पप गायक सुदन बास्कोटा, लोकदोहोरी गायक संजय शौगात, राज केसी र पवित्रा थापाको नृत्य, तेस्रो लिंगी नृत्यङ्गा विनीता शाही, अवन्तिका घर्तीको लगायतको प्रस्तुती रहने छ ।
उद्योग संघले उपत्यका बाहिर पहिलो पटक २०४५ सालमा बुटवलमा प्रदर्शनीको आयोजना गरेको हो । जारी प्रदर्शनीमा स्वदेशी उत्पादनको प्रदर्शनी, प्रवद्र्धन तथा बजारिकरण, प्रविधि प्रदर्शन, पर्यटन प्रवद्र्धन एवं सूचना केन्द्र, विभिन्न लोक सांस्कृतिक प्रदर्शन, दोहोरी गीत, लोकगीत र नृत्य प्रतियोगिता, प्रदर्शनी आइडल, औद्योगिक सूचना केन्द्रको सञ्चालन, आकर्षक रेष्टुरेन्टहरू र कृषि ग्राम सञ्चालन भएका छन् । प्रदर्शनीको करिव ६ लाख दर्शकले अवलोकन गर्ने र २० करोडको कारोवार हुने अनुमान गरिएको छ ।

 

भाच्चिए सिक्सलेन सडकखण्डका फलामे रेलिङ्गहरु, निगरानी कसको ??

प्रकाश पाण्डे

भाच्चिए सडकछेउका फलामे रेलिङ्ग पोष्टहरु, कुरुप बन्दै सिक्सलेन सडकखण्ड, निगरानी कसको ?? 

रुपन्देहीको भबिस्यसँग जोडिएको सिक्सलेन सडकखण्ड निर्माण सम्पन्न नहुदै कुरुप बन्दै गएको प्रति सरोकारवालाहरुले चिन्ता ब्यक्त गरेका छन । सिक्सलेन अन्र्तगत माथिल्लो क्षेत्रमा अहिलेसम्म बुटवलदेखि मणिग्रामसम्मको करीब ८ कि.मि. काम सम्पन्न भएको छ । घरै अघि सिक्सलेन निर्माण सम्पन्न भएको छ तर सडकको रेखदेख कसको हो ? यसको सहि ब्यवस्थापन कसले वहन गर्ने ? नत स्थानियलाई चासो छ नत सडक निर्माणको जिम्मा लिएको ठेकेदार कम्पनिलाई नै । जसको कारण सिक्सलेनको सुन्दरता एंव सुरक्षालाई मध्यनजर गर्दै सडकछेउमा निर्माण गरिएका फलामे रेलिङ्ग पोष्टहरुको रेखदेख एंव निगरानी नहुदाँ तोडफोड र भाच्चिएका छन । यात्रुहरुको सहजताको लागी निर्माण गरिएका कतिपय प्रतिक्षालय पनि दयनीय अवस्थामा पुगेका छन ।
“ग्रीन तिलोत्तमा–क्लिन तिलोत्तमा” माथिको धावा–
बाहिरबाट झट्ट हेर्दा सिक्सलेन सुन्दर, हराभरा एंव ढकमक्क फुलेका फुलहरुले मनमोहक देखिए पनि सिक्सलेन खण्डको भित्रि पाटोहरु केलाउदै जाँदा छिट्टै नै मानवीय अतिक्रमणले यसको स्वरुप परिवर्तन भै कुरुप हुने हो की भन्ने चासो र चिन्ता बढेर गएको छ । बुटवलबाट योगिकुटी चोक हुदै मणिग्रामसम्म आइपुग्दा ठाउँ–ठाउँमा सडक छेउछाउका रेलिङ्ग पोष्टहरु भाच्चिएका छन भने प्रतिक्षालयहरुमा समेत तोडफोड र छेडखानी गरिएको छ ।  ड्राइभरटोल चोक मै रहेको प्रतिक्षालय ढल्ने स्थितिमा पुगेको छ । बाहिरबाट हेर्दा घुडा टेक्न लागेको जस्तो भान पर्ने सो प्रतिक्षालय जुनसुकै बेला पल्टिएर मानबिय क्षति हुने प्रबल संभावना छ । प्रतिक्षालयको उत्तरतर्फको टेका भाच्चिएर खुम्चिएको छ भने सिङ्गो प्रतिक्षालय खण्डहर जस्तै देखिन्छ । तिलोत्तमा–४ ड्राइभरटोलचोकमा किराना पसल सञ्चालन गर्दै आएका अशोक खत्रीका अनुसार करीब २५ दिन अघि प्रतिक्षालयमा सेतो रंगको ट्रयाक्सले ठक्कर दिएको थियो । साँझको बेला ठक्कर दिएकाले सो गाडीको नम्बर पहिचान गर्न गाह्रो परेको उनको भनाई छ । ठक्कर दिए लगत्तै ड्राइभरटोल प्रहरीलाई खबर गरि घटनाबारे जानकारी दिएपनि प्रहरी आइनपुग्दै गाडीवाल फरार भएको खत्रीको भनाईलाई उद्दत गर्दै अस्थायी प्रहरी चौकी ड्राइभरटोलका सई तारा अधिकारीले जानकारी दिए । उनका अनुशार “ठक्कर दिने बित्तिकै बुटवल लगायतका नाकाहरुमा प्रहरीलाई खबर गरि सो गाडीबारे खोज तलासी गर्यौ तर पत्तो लागेन” ।
अस्पताल अगाडी लत्रेको रेलिङ्ग /छैन जेब्राक्रसिङ्ग–
मणिग्रामको क्रिमसन अस्पताल अगाडी पनि फलामे रेलिङ्ग पोष्टहरु भाच्चिएर कच्याककुच्चुक भएको २० दिन नाघिसकेको छ ।  मानिसहरुको बढी नै चहलपहल हुने सो क्षेत्रमा सिक्सलेन सडकखण्ड वारपार गर्न न त जेब्राक्रसिङ्ग कै ब्यवस्था गरिएको छ न त भाच्चिएको रेलिङ्ग पुनःनिर्माणबारे कसैलाई चासो नै । अस्पताल बाहिर ब्यापार–ब्यवसाय गर्नेहरुका अनुशार करीब २० दिन अघि ट्रयाक्टर बोकेको ट्रक घुमाउने क्रममा बारमा लागेर सो रेलिङ्ग क्षतिग्रस्त भएको थियो । साँझको बेला भएकाले पनि ट्रकको नम्बर लिन नसकिएको उनीहरुले बताए । स्थानीय कै भनाईमा “अस्पताल अगाडीको घटना भएकाले यस्ता कुराहरुमा अस्पताल प्रशासनको पनि ध्यान जानु पर्ने हो । तर गएको देखिएन” । यसैगरि योगिकुटी देखि केही तल पनि रेलिङ्गहरु भाच्चिएर सडकमा यत्रतत्र फालिएका छन तर यसबारे नत त्यहाँका स्थानीयलाई नै कुनै चासो छ नत निर्माण कम्पनिलाई नै । करीब डेढ बर्ष अघि मध्यरातमा बुटवलबाट हुइकिदै आएको कार अनियन्त्रित भई आफनो ट्रयाक छोडी रेलिङ्गमा ठोक्किन पुग्दा कारमा सवार दुई जना मध्ये एक जना सख्त घाइते भएको स्थानियले बताए । योगिकुटी कै स्थानियहरुको भनाईमा “घाइतेहरु उपचार पश्चात सामान्य अवस्थामा फर्किसकेका छन तर सडकको रेलिङ्गले भने अहिलेसम्म उपचार पाएको छैन ।”
९९ वटा रेलिङ्ग पोष्टमा क्षति / ब्यापारिक मार्ग बिस्तार आयोजना–
बुटवल चौराहादेखि मणिग्रामसम्म ९९ वटा रेलिङ्ग पोष्ट क्षतिग्रस्त भएका छन । ब्यापारिक मार्ग बिस्तार आयोजना बुटवल–बेलहियाका ईन्जिनियर गोबिन्द कुमार श्रेष्ठका अनुसार अधिकांश क्षतिका घटना रातको समयमा हुने गरेका कारणले दोषिहरु कार्वाहीको दायरामा आउन सकेका छैनन । राती मदिरा सेवन गरि अनियन्त्रित रुपमा गाडी कुदाउनेहरुबाट ज्यादातर यस्ता घटना हुने गरेका छन । त्यस्तैे दिउसै पनि खुल्ला सडकमा हावाको बेगमा सवारी साधन हुइकाउनेहरुले पनि यस्ता घटना घटाउने र भाग्ने गरेका छन । श्रेष्ठले दिएको जानकारी अनुसार रेलिङ्ग भाच्ने कार्यमा संलग्नहरुबाट अहिलेसम्म हर्जाना बापत १ लाख ५० हजार पेनाल्टी तिराईएको छ । तर क्षति भएका सबै रेलिङ्ग पोष्टहरुको पुर्न निर्माणको हिसाब निकाल्दा भने करीब साँढे ४ लाख खर्च आउने उनले जानकारी दिए ।
१ महिना भित्रै क्षतिग्रस्त रेलिङ्ग र प्रतिक्षालयको पुर्ननिर्माण हुन्छ ; ई. श्रेष्ठ–
भत्काईएका फलामे रेलिङ्ग र ड्राइभरटोलमा घाइते अवस्थामा रहेको रुग्ण प्रतिक्षालयबारे आफुहरु पूर्ण जानकार रहेको बताउदै इन्जिनियर श्रेष्ठले अबको एक महिना भित्रै पुर्न निमार्ण सम्पन्न भैसक्ने दाबी गरे । “सानो काम भएकाले काम गर्ने ठेकेदार नपाउँदा अलिकता ढिलाई हुन गएको हो, अहिले भने जस्तै काम गर्ने मान्छे भेटेका छौ श्रेष्ठले भने, अबको एक महिना मै रिजल्ट आउने छ ।

” उनका अनुसार जानकीनगरदेखि मणिग्रामसम्मको जम्मा ३ किलोमिटरको काम “शर्मा लामा कान्छाराम” भन्ने कम्पनिको भएकाले उसैको मातहतमा बिग्रे भत्केका काम सम्पन्न गर्ने गरि पुर्न निमार्णको काम शुरु गरिसकिएको छ भने जानकीनगरदेखि माथिल्लो खण्ड बुटवलसम्म भने आफुहरु कै मातहतमा एक महिना भित्रै काम सम्पन्न गरिने प्रतिबद्धता जनाएका छन ।
सिक्सलेन सडकखण्डले नगरको सुन्दरता बढाएको त छ नै, ब्यापारिक र ब्यवसायिक दृष्टिकोणले पनि यो सडकखण्ड अति महत्वपुर्ण मानिन्छ । देश कै सबैभन्दा ठुलो नाकाहरु मध्येको एक बेलहिया नाका जोडने यो सडक भारतीय नाकाबन्दी र मधेश आन्दोलनका बेला पनि निर्बाध सञ्चालनमा रहेको थियो । तसर्थ देशकै आर्थिक मेरुदण्डका रुपमा रहेको सिक्सलेन सडकखण्डको संरक्षण, सम्त्र्रधन र सुरक्षा गर्नु तपाई हामी सबैको कर्तब्य हुन आउँछ ।

जनज्योति फुटबलमा / देशभक्त नवलपरासी र नारायणघाट फुटबल क्लब फाईनलमा

पौष १३, तिलोत्तमा 

प्रथम जनज्योती कप नकआउट फुटवल प्रतियोगिता २०७४ को उपाधिका लागि देशभक्त युवा क्लब, नवलपरासी र नारायणघाट फुटबल क्लब, चितवन भिड्ने भएका छन । बिहिबार सम्पन्न निक्कै प्रतिस्प्रर्धात्मक दोस्रो सेमीफाईनल खेलमा नारायणघाट युवा क्लब, चितवनले भैरव स्पोर्ट क्लब, नवलपरासी माथि १–० गोल अन्तरको जित निकाल्दै फाईनलमा स्थान पक्का गरेको हो ।

तिलोत्तमा नगरपालिकाको डिङ्गरनगरस्थित जनज्योती खेलमैदानमा भएको खेलमा अन्तिम समयमा नारायणघाट एफसीका सुधान्स महतोले ८३ औ मिनेटमा आकंषक गोल गरेका थिए । प्रतियोगितामा महतो म्यान अफि दी म्याचबाट पुरस्कृत समेत भए ।

प्रतियोगताको फाईनल खेलका साथै औपचारिक समापन कार्यक्रम शनिबार हुने खेल संयोजक जहरसिह रानाले बताए । यसैगरि शुक्रबार मैत्रीपूर्ण फुटबल प्रतियोगिता समेत आयोजना गरिएको क्लबका अध्यक्ष मित्रलाल न्यौपानेले बताए । प्रतियोगितामा उपाधी विजेता टिमलाई नगद रू १ लाख ११ हजार १ सय ११ एंव उपविजेता टीमलाई नगद रु ५५ हजार ५ सय ५५ सहित ट्रफी, प्रमाणपत्र तथा मेडलको ब्यवस्था गरिएको छ भने, अनुशासित एंव उत्कृष्ट खेल प्रदर्शन गर्ने टोलिलाई समेत रु ११ हजार १ सय ११ सहित ट्रफी, प्रमाणपत्र र मेडलको ब्यवस्था गरिएको छ । प्रतियोगितामा उत्कृष्ट खेलाडी, उत्कृष्ट गोलकिपर, हाईस्कोरर, अनुशासित खेलाडीलाई समेत ट्रफीबाट पुरस्कृत गर्ने ब्यवस्था रहेको छ ।
रुपन्देहीसंगसँगै नवलपरासी, कपिलबस्तु, दाङ्ग, चितवन , लगायतका जिल्लाबाट गरि कुल १६ वटा क्लबको सहभागिता रहेको प्रतियोगितामा ५ जनासम्म बिदेशी खेलाडी समावेश गराउन पाउने नियम राखिएको छ । प्रतियोगिता हेर्न आउने दर्शकहरुका लागी १०० रुपैया टिकटको ब्यवस्था गरिएको प्रतियोगितामा महिला, अपाङ्गता भएका व्यक्ति, बालबालिका तथा बृद्दबृद्दालाई निःशुल्क प्रवेशको ब्यवस्था मिलाइएको छ ।

कस्तो बन्ला रानीपोखरी ?

रानीपोखरी पुनः निर्माण अब प्रताप मल्लकालीन शैली, स्वरुपअनुसार नै निर्माण गरिने भएको छ। काठमाडौं महानगरका मेयर विद्यासुन्दर शाक्यको अध्यक्षतामा पुनः निर्माण प्राधिकरण र पुरातत्व विभागका पदाधिकारीको संयुक्त बैठकले मल्लकालीन स्वरुप र शैलीअनुरुप नै निर्माण गर्ने निणर्य गरेको हो।

मंगलबार प्रमुख शाक्य र उपप्रमुख हरिप्रभा खड्गीबीच निर्माणको विषयलाई लिएर विवाद भएपछि आज बसेको बैठकले पुनः निर्माणका लागि अध्ययन गरी १५ दिनभित्र सुझाव सहितको प्रतिवेदन पेश गर्न पुरातत्व विभागका पूर्वमहानिर्देशक विष्णुराज कार्कीको संयोजकत्वमा ११ सदस्यीय समिति गठन गरेको छ।

समितिको प्रतिवेदन पेश भई अर्को निर्णय नआउँदासम्मका लागि पुनःनिर्माणको काम नहुने मेयर शाक्यले जानकारी दिए।

इतिहासमा उल्लेख भएअनुसार प्रताप मल्लका कान्छा छोरा चक्रवर्तीन्द्रको मृत्युपछि रानीलाई शोकबाट मुक्त गराउन विसं १७२७ मा दुई वर्ष लगाएर बनाइएको सो पोखरी विसं २०७२ वैशाख १२ को भूकम्पले क्षतिग्रस्त बनाएको थियो ।

को-को छन् समितिमा ?

संयोजकः विष्णुराज कार्की, पूर्व महानिर्देशक, पुरातत्व विभाग

सदस्यः सूर्यभक्त साँगाछे, पूर्व महानिर्देशक, भवन विभाग

राजु मानन्धर, महाशाखा प्रमुख (सम्पदा), राष्ट्रिय पुनर्निमाण प्राधिकरण

सुदर्शनराज तिवारी, संस्कृतिविद्

पुरुषोत्तम डंगोल, स्ट्रक्चरल इन्जिनियर, पुरातत्व विभाग

काशीना तमोट, संस्कृतिविद्

सम्पत घिमिरे, डिभिजन इन्जिनियर, पुरातत्व विभाग

राम बहादुर कुँवर, प्रमुख पुरातत्व अधिकृत, पुरातत्व विभाग

चिनियामान ब्रजाचार्य, वडा अध्यक्ष, काठमाडौं महानगरपालिका वडा नं २७

भाइराम खड्की, वडा अध्यक्ष, काठमाडौं महानगरपालिका वडा नं २८

सदस्य सचिवः धनिराम शर्मा प्रमुख प्रशासकीय अधिकृत, काठमाडौं महानगरपालिका

विद्युत खरिद सम्झौता नवीकरण गर्न कुलमान घिसिङसहितको टोली नयाँदिल्ली प्रस्थान

काठमाडौँ : विद्युत् खरिद सम्झौता नविकरण गर्न नेपाल विद्युत् प्राधिकरणका कार्यकारी निर्देशक कुलमान घिसिङलगायतको उच्चस्तरीय टोली आज भारतको राजधानी नयाँदिल्ली प्रस्थान गरेको छ।

प्राधिकरणका प्रवक्ता प्रबल अधिकारीले पुस १६ गतेदेखि सकिन लागेको विद्युत् खरिद सम्झौता नवीकरण गर्ने उद्देश्यका साथ कार्यकारी निर्देशकसहितको टोली भारत प्रस्थान गरेको जानकारी दिनुभयो। प्रतिनिधिमण्डलमा कार्यकारी निर्देशक घिसिङ र प्रवक्ता अधिकारी सम्मिलित छन्। ढल्केबर–मुजफ्फरपुर अन्तरदेशीय प्रसारण लाइनमार्फत आयात भइरहेको १४५ मेगावाट बिजुलीको सम्झौता नवीकरण गर्न आज बिहानै उच्चस्तरीय टोली त्यसतर्फ प्रस्थान गरेको हो।

भारतको विद्युत् व्यापारको नोडल एजेन्सी विद्युत् व्यापार निगम (एनभिभीएन) लिमिटेडका अधिकारीसँग घिसिङ नेतृत्वको टोलीले छलफल गर्ने र सम्झौता नवीकरण गर्ने कार्यसूची रहेको छ। एनभिभीएनबाट बिजुली आयातलाई निरन्तरता दिने विषयमा स्पष्ट जवाफ नआएको र सम्झौताको म्याद सकिन लागेपछि थप छलफल आवश्यक देखिएको प्राधिकरणले जनाएको छ।

ढल्केबर–मुज्जफरपुर अन्तरदेशीय प्रसारणलाइनबाट आयात भइरहेको बिजुलीको सम्झौता पुस १६ गतेदेखि सकिँदैछ। ढल्केबर—मुज्जफरपुर अन्तरदेशीय प्रसारणलाइनबाट १४५ मेगावाट बिजुली प्रतियुनिट पाँच रुपैयाँ ७६ पैसाअर्थात ३.६० भारुमा आयात भइरहेको छ। भारतबाट विद्युत् उपलब्ध हुन नसकेमा विद्युत्भार कटौती हुने आशंका बढेको भन्दै प्राधिकरणले दिल्ली बैठकलाई महत्वपूर्ण बैठकका रुपमा लिएको छ।

भारतबाट नेपालले यस हिउँदका लागि करिब ३७० मेगावाट विद्युत् खरिद गर्ने योजना बनाएको छ। विद्युत् प्रवाहमा सहजता ल्याउनका लागिसमेत थप विद्युत् जरुरी रहेको बताइएको छ। तीन महिना पहिले प्राधिकरण र एनभिभीएनबीच भएको सम्झौता नवीकरण गरेर विद्युत् आयातमा सहजता ल्याउने लक्ष्य राखिएको प्रवक्ता अधिकारीले बताए।रासस

माघबाट नेपालमै सिटामोल उत्पादन हुने, नेपाल औषधि लिमिटेड पुनः सञ्चालनको एक वर्षमा

काठमाडौं: जीवनजल उत्पादन गरेको नौ महिनापछि नेपाल ‌औषधि लिमिटेडले सिटामोल उत्पादन गर्ने भएको छ।

सिटामोल उत्पादनका लागि ९० प्रतिशतभन्दा बढी काम सम्पन्न भइसकेको कम्पनीका महाप्रवन्धक डा. रोभशकुसम सुवेदीले जानकारी दिए। सुवेदीका अनुसार माग दोस्रो सातादेखि सिटामोल उत्पादन भएर बजारमा जानेछ। गत वैशाखमा जीवनजल उत्पादन सुरु गरेको कम्पनीले दशैं, तिहार अगावै सिटामोल उत्पादनको तयारी गरेको थियो।

तर कच्चा पदार्थ सबै भारतबाट आयात गर्नु पर्ने र टेण्डर गरिसकेपछि भारतमा जिएसटी कार्यान्वयमा आएका कारण मंसिरमा सिटामोल उत्पादन गर्ने तयारी गरिएको थियो। मंसिरमा पनि समय घर्किएपछि अब माघ दोस्रो साता मात्र सिटामोल उत्पादन हुनेछ। गत वर्ष असोजमा तत्कालीन उद्योगमन्त्री नविन्द्रराज जोशीले तीन महिनाभित्र ८ प्रकारका औषधि सिटामोल, आइरन चक्की, जीवनजल, अल्वाजोल, एमोक्सोसिलिन, कफनास, एमजीट र कफहिस उत्पादन सुरु गर्ने बताएका थिए।

तीन महिनाभित्र ८ प्रकारका औषधि उत्पादन गर्ने भनिए पनि ६ महिनापछि गत वैशाख २४ गते मात्र जीवनजलको उत्पादन सुरु भएको थियो। कच्चा पदार्थ सबै नेपाल आइसकेको र औषधी उत्पादनका लागि आवश्यक पर्ने मेसिन पनि आउने क्रममा रहेकाले एक महिनाभित्रै सिटामोल उत्पादन थाल्ने सुवेदीले दाबी गरे।

२०६० सालसम्म १२० वटा औषधी उत्पादन गरिरहेको लिमिटेडले ५५० जना कर्मचारी हुने बेलामा बोनस समेत बाँडेको थियो। त्यसपछि उद्योगको अवस्था निरन्तर ओरालो लाग्दा बिगत ८ वर्षदेखि ग्लिसिरिन र डिस्टिल वाटर मात्र उत्पादन गरिरहेको थियो।

कम्पनीमा सुधार

औषधि लिमिटेडले प्रशासनिक सुधारलार्इ अघि बढाएको दाबी गरेको छ। कम्प्युटर प्रविधिको सुरुवात, विद्युतीय हाजिरीको सुरुवात, वेवसाइटको स्थापना, २४ सै घण्टा सुरक्षा, जिएमपी मापदण्डमा आवश्यक प्राविधिकहरुको नियुक्ती र प्रशिक्षण लगायतका काम गरिएको कम्पनीले जानकारी दिएको छ।

पुस १८ गतेदेखि नारायणगढ–मुग्लिन सडकमा राति यातायात बन्द गरिने

चितवन : नारायणगढ–मुग्लिन सडकखण्डमा पुस १८ गतेदेखि राति यातायात बन्द गरिने भएको छ। सडक विस्तारको काम भइरहेको सडक खण्डमा भित्तो काट्ने काम बाँकी रहेकाले राति १० देखि बिहान ४ बजेसम्म सवारी रोकेर काम गरिने भएको हो। काममा सन्तोषजनक प्रगति भएको नपाइएपछि कामलाई तीव्रता दिन यातायात रोकेर काम गर्न लागिएको हो।

जिल्ला प्रशासन कार्यालय भरतपुरमा बुधबार भएको सरोकारवालाहरुको बैठकले राति पाँच घण्टा र दिउँसोको समयमा एकतर्फी सवारी सञ्चालन गरेर कामलाई तीव्रता दिने निर्णय गरेको हो। बैठकमा प्रमुख जिल्ला अधिकारी नारायणप्रसाद भट्ट, नारायणगढ–मुग्लिन सडक आयोजनाका प्रमुख चन्द्रनारायण यादव, सुरक्षा निकायका प्रमुख, ठेकेदार कम्पनीका प्रतिनिधि, जनप्रतिनिधि र सरोकारवाला निकायका प्रतिनिधिको सहभागिता थियो।

बैठकले रातिको समयमा भित्तो काट्ने, सम्याउनलगायत काम गर्ने र दिउँसोको समयमा एकतर्फी सवारी सञ्चालन गरेर कालोपत्र गर्ने कामलाई अगाडि बढाउने निर्णय गरेको छ। त्यस्तै बैठकले ट्राफिक व्यवस्थापनलाई चुस्त बनाई सवारी आवागमन प्रभावकारी बनाउने, सवारी रोकिएको समयमा कामलाई तीव्रता दिने र रातिको समयका काम गर्न विद्युत् प्राधिकरणसँग समन्वय गरी उज्यालोको व्यवस्था गर्ने निर्णय गरेको छ।

ठेकेदार कम्पनीका प्रतिनिधिहरुले भने दिउँसो आठ घण्टा सवारी रोकेर काम गर्न दिन माग गरेका थिए । रातिमा काम गर्ने जनशक्ति अभाव हुने र कामलाई सोचेजति छिटो गर्न नसकिने उनीहरुको भनाइ थियो। प्रजिअ भट्टले काम सन्तोषजनक रुपमा अगाडि बढ्न नसकेको र यसअघि गरिएका निर्णयलाई कार्यान्वयन नगरिएको बताउँदै कामलाई तीव्रता दिन आग्रह गरेका थिए।

नारायणगढ–मुग्लिन सडक आयोजनाका प्रमुख यादवले विगतमा नाकाबन्दी, चक्काजाम, इन्धन अभावका कारण कामको प्रगति हुन नसकेको बताउँदै चालु आर्थिक वर्षमा पनि वर्षा, चाडपर्व र निर्वाचनले गर्दा सोचे जति काममा प्रगति हुन नसकेको स्पष्ट पारे।उनका अनुसार हालसम्म समग्रमा ६८ प्रतिशत काम सम्पन्न भएको छ । पहिलो खण्डमा ६८ प्रतिशत, दोस्रो खण्डमा ७४ प्रतिशत र तेस्रो खण्डमा ६१ प्रतिशत काम सम्पन्न भएको छ।

उक्त सडकखण्डको १६ किलो र २२ किलोमा ५०० मिटर र ३३ किलोमा ३०० मिटर भित्तो काट्ने काम अझै बाँकी रहेको आयोजनाका इञ्जिनियर शिव खनालले जानकारी दिए। उनका अनुसार अहिलेसम्म १३ दशमलव ५ किलोमिटर सडक एक तह कालोपत्र भएको छ। सो सडक तीन पत्र कालोपत्र गरिँदै छ । राजधानी प्रवेशको ‘लाइफलाइन’का रुपमा यो सडकलाई लिने गरिन्छ।रासस

‘सिलवाललाई अनुसन्धान गर्न पाइन्छ,तर कुनै राजनीतिक पूर्वाग्रह हुनु हुँदैन- नेकपा एमाले

पूर्व डिआइजी नवराज सिलवालबारे एमालेको मौनता?

सविन ढकाल

काठमाडौं : पूर्व डिआइजी नवराज सिलवाल विगत एक वर्षदेखि नेपाल प्रहरी संगठन र राजनीतिमा समेत चर्चित रहे। संगठनभित्र आइजी प्रकरणले उनलाई बहसमा ल्यायो। नेपाल प्रहरीको २५ औं महानिरीक्षक बन्ने लाइनमा थिए सिलवाल। वरियताक्रममा उनी अगाडि नै थिए। तर, पुष्पकमल दाहाल ‘प्रचण्ड’ नेतृत्वको सरकारको रोजाइमा उनी परेनन्। त्यसपछि आफूलाई अन्याय भएको भन्दै उनी अदालतको ढोका ढक्कढकाउन पुगे।

प्रहरी महानिरीक्षक नियुक्तिसम्बन्धी यही विषयले देशको कार्यपालिका, न्यायपालिका मात्रै नभई व्यवस्थापिका समेत विवादमा तानियो। प्रधानन्यायाधीश सुशीला कार्कीविरुद्ध वैशाख १७ गते कांग्रेस र माओवादी सांसदहरुको हस्ताक्षरसहित महाअभियोग दर्ता भयो। त्यसका लागि ‘उत्प्रेरक’ यिनै थिए। सिलवालको बढुवाको विषयले नै कार्यपालिका र न्यायपालिकाबीचको तिक्तता बढायो।

महाअभियोग दर्तापछि त्यसलाई प्रतिपक्षी दल नेकपा एमालेले राम्ररी ‘क्यास’ गर्‍यो। त्यतिमात्र होइन नेकपा एमालेले डिआइजी सिलवालको पक्षमा वकलात गर्दै हिँड्यो। एमाले अध्यक्ष केपी शर्मा ओलीले संसददेखि आफ्ना सानातिना कार्यक्रममा समेत सिलवाललाई सरकारले अन्याय गरेको भन्दै उनको बचाउमा उत्रिए।

सर्वोच्च अदालतको बृहद् पूर्ण इजलासले कार्यसम्पादन मूल्याङ्कनमा प्रकाश अर्याल नै पहिलो नम्बरमा रहेको भन्दै नवराज सिलवालले दायर गरेको रिट खारेज गरिदियो। सिलवालको आइजी हुने सपना तुहियो। एमालेलाई अदालतको फैसलाले चित्त बुझेन। अध्यक्ष ओलीले सरकारले न्यायालयलाई दवावमा पारेर निर्णय भएको भन्दै आलोचना गरी नै रहे। चुनावका लागि सिलवाल त्यस्तो ‘आइकन’ बने जसले प्रधान न्यायाधीश कार्कीको इमान्दारितामाथि नेपाली कांग्रेसले हिलो छ्यापेको स्थापित गराइ नै रह्यो।

आइजी हुने सपना तुहिएपछि सिलवालले एकाएक प्रहरी संगठनबाट राजीनामा दिए। लगत्तै उनी एमालेमा प्रवेश गरे। एमालेमा प्रवेश गरेको महिना दिन हुन नपाउँदै प्रदेश सभाको टिकट दिने चर्चा चल्यो। तर, त्यो भन्दा शक्तिशाली अर्थात् प्रतिनिधि सभाको टिकट हात पारे उनले।
एमालेबाट टिकट पाएका उनी देशमा बाम लहर आउँदा निर्वाचित पनि भए। सिलवाल प्रकरण एमालेका लागि प्रचारको गतिलो ब्रान्ड थियो।
सांसद बने पनि सिलवालविरुद्ध महानगरीय प्रहरी परिसर काठमाडौँमा कीर्तेको अनुसन्धान अगाडि बढेको छ। गत पुस ५ गते उनी विरुद्ध कीर्ते गरेको अभियोगमा जाहेरी दर्ता भएको थियो।

आफूलाई प्रहरी महानिरीक्षक बनाउनुपर्ने दावीसहित सिलवालले सर्वोच्च अदालतमा दायर गरेको रिट खारेजीसँगै प्रहरी प्रधान कार्यालयले सिलवाललाई कानुन बमोजिम गोप्य रहनुपर्ने कार्यसम्पादन मूल्याङ्कन फाइल कीर्ते गरेको अभियोगमा अनुसन्धान गरिरहेको छ। सिलवालको अनुसन्धान परिसरमा तीव्ररुपले बढ्दा एमाले अध्यक्ष केपी शर्मा ओली भने यतिखेर औपचारिक रुपमा खुलेका छैनन्। शुरुका दिनमा सिलवालका पक्षमा खुलेर बोल्ने ओली केही दिनदेखि विभिन्न कार्यक्रममा सहभागी भए पनि यसबारे मौन देखिएका छन्। यो मौनताको अर्थ के त?

नेकपा एमाले पार्टीले पनि सिलवालको विषयमा कुनै आधिकारिक धारणा सार्वजनिक गरेको छैन। भलै पार्टी सचिव योगेश भट्टराई एमाले सिलवालको विषयमा मौन नरहेको बताउँछन्। भन्छन्, ‘सिलवाल एमालेका सांसद हुन्। उनको कार्य क्षमता, स्वच्छतालाई देखेर नै टिकट दिएको हो। अहिले जे देखिएका छन् ती पूर्वाग्रहका कुरा होलान्।’

काठमाडौं परिसरले सिलवालको अनुसन्धानको लागि आवश्यक कागजपत्र उपलव्ध गराउन सम्बन्धित निकायलाई पत्राचार गरिसकेको छ। सिलवाल एमाले संसाद भए पनि कानुनी कुरा व्यक्तिगत भएको भट्टराईको भनाइ छ। उनी भन्छन्, ‘सिलवाललाई अनुसन्धान गर्न पाइन्छ तर कुनै राजनीतिक पूर्वाग्रह हुनु हुँदैन भन्ने पार्टीको धारणा हो। अनुसन्धान त हाम्रो पार्टी अध्यक्ष, मलाई र जसलाई पनि हुनसक्छ। तर स्वतन्त्ररुपमा अनुसन्धान होस्।’

RECENT POSTS