Sunday, July 12, 2020

प्रदेश ५ को नीति तथा कार्यक्रम : राजधानीको टुंगो साउनपछि

बुटवल । प्रदेश ५ सरकारले कोरोना संक्रमणको महामारी नियन्त्रण भएपछि मात्रै प्रदेशको स्थायी राजधानी र नामाकरणको टुंगो लगाउने भएको छ ।शनिबार प्रदेश सभा वैठकमा प्रस्तुत आर्थिक वर्ष २०७७–०७८ को नीति तथा कार्यक्रममा कोरोना नियन्त्रण भएपछि राजधानी र नामाकरणको टुंगो लाग्ने उल्लेख छ ।प्रदेश स्थापनाको तेस्रो वर्षको उत्तरार्धमा आइपुग्दा समेत प्रदेशको स्थायी राजधानी र नामाकरण टुंगो लाग्न सकेको छैन । राजधानीको टुंगो लागेपछि राजधानी तोकिएको स्थानमा आवश्यक जग्गा प्राप्ति, प्रदेशको विकासको गुरुयोजना बनाइने र संरचना निर्माण गरिने नीति तथा कार्यक्रममा उल्लेख छ । प्रदेश सरकारको तर्फबाट शनिबार प्रदेश प्रमुख धर्मनाथ यादवले आर्थिक वर्ष २०७७–०७८ को नीति तथा कार्यक्रम प्रस्तुत गरेका थिए ।

प्रदेश सरकारले लकडाउन सकिएको छोटो समयभित्रै लगानी सम्मेलन गर्ने जनाएको छ । कोभिड १९ का कारण रोकिएका सबै कार्यक्रम आगामी आर्थिक बर्ष (साउन) पछि अगाडि बढाउने उल्लेख गरिएको छ ।नीति तथा कार्यक्रममा महामारीले पु¥याएको क्षतिलाई पूर्ति गर्ने कार्यक्रम सञ्चालन, विदेशबाट विस्थापित नेपालीलाई रोजगारी दिने र कृषिलाई प्राथमिकता दिइने उल्लेख छ ।मध्यपहाडी कृषि विकास फर्म निर्माण, उत्कृष्ट किसानलाई प्रोत्साहन र पुरस्कार, कृषि श्रमिकलाई उद्यमी बनाउने, स्मार्ट कृषि कार्यक्रमलाई सबै पालिकामा सञ्चालन, सुलभ कर्जा र ब्याजमा अनुदान र पूर्वी रुकुमलाई पूर्ण अर्गानिक जिल्ला घोषणा गर्ने नीति तथा कार्यक्रममा उल्लेख छ ।

यस्तै आत्मनिर्भर अर्थतन्त्र निर्माण, घरेलु तथा साना उद्योगलाई प्राथमिकता, एक पालिका एक औद्योगिक ग्रामको कार्यक्रमलाई निरन्तरता, स्वदेशी उद्योगमा उत्पादित वस्तुको प्रयोगमा प्राथमिकता, विदेशबाट फर्केको जनशक्ति प्रयोग हुने उद्योगलाई विशेष प्राथमिकता दिने प्रदेश सरकारले नीति लिएको छ ।नवलपरासी, रुपन्देही र कपिलवस्तुलाई समेटेर बृहत्तर लुम्बिनी पर्यटन प्रवर्द्धन कार्यक्रम लागु गरिने र पर्यटनलाई विकास गरी रोजगारी सिर्जना गरिने उल्लेख छ ।प्रदेशलाई पश्चिम नेपालको औद्योगिक हबको रुपमा विकास गर्न केन्द्र सरकारसंगको सहकार्यमा ठूला औद्योगिक क्षेत्र र औद्योगिक करिडोर निर्माणमा जोड दिइने प्रदेश सरकारको नीति छ ।

३० हजार बेड क्वारेन्टाइन, २५० आइसोलेसन
कोभिड १९ को रोकथाम, नियन्त्रण र उपचारका लागि प्रदेश सरकारले बुटवल, भैरहवा, दाङ र नेपालगञ्जमा कोरोना विशेष अस्पताल र बुटवल, दाङ र नेपालगञ्जमा कोभिड १९ को परीक्षण प्रयोगशाला स्थापना गरेको छ ।जिल्ला तह र स्थानीय तहसंगको समन्वयमा पालिकाहरुमा गरी झण्डै ३० हजार बेड क्षमताका क्वारेन्टाइनहरु निर्माण गरी सञ्चालन गरिएको पनि नीति तथा कार्यक्रममा उल्लेख छ ।कोभिड १९ का संक्रमितहरुको संख्या बढिरहेको अवस्थालाई दृष्टिगत गरी पहाडी जिल्लामा न्युनतम ५० बेड र तराईका जिल्लामा दुई सय बेडको आइसोलेसन केन्द्र निर्माणको प्रक्रिया अघि बढेको पनि उल्लेख गरिएको छ ।साउन महिना सम्ममा कोभिड १९ संक्रमणलाई स्थिर बनाउने र क्रमशः रोकथाम तथा नियन्त्रणमा सफलता हासिल गर्ने लक्ष्य प्रदेश सरकारले राखेको छ ।

त्यसका लागि नागरिकको रोग प्रतिरोधी क्षमता विकासमा जोड दिइने पनि उल्लेख गरिएको छ ।बजेट बिनियोजन गर्दा कोभिड १९ नियन्त्रण, कृषि, रोजगारी वृद्धि, गरिबी निवारण, आयआर्जन र सार्वजनिक निर्माणमा जोड दिने नीति तथा कार्यक्रममा जनाइएको छ । अनुत्पादक खर्च कटौती गर्न अत्यावश्यक बाहेकका नयाँ कार्यालय, निकाय, प्रतिष्ठान, केन्द्र वा संस्था खोल्न बजेट विनियोजन नगर्ने पनि प्रदेश सरकारको घोषणा छ ।कृषि क्षेत्रको उत्पादन र उत्पादकत्व वृद्धिका कार्यक्रम अघि वढाइने, कृषि प्राविधिक सेवा तथा उत्पादन सामग्री सहज बनाउने, कृषिको अनुदान दिलाई थप विश्वसनीय बनाउने पनि प्रदेश सरकारको नीति छ ।आगामी आर्थिक बर्षमा प्रदेश पूर्वाधार विकासको गुरुयोजना तयार गरी कार्यान्वयन गर्ने र उक्त गुरुयोजनामा प्रदेश गौरवका आयोजना र रणनीतिक महत्वका पूर्वाधार विकासका आयोजना पहिचान गरी अघि बढाउने सरकारको नीति छ ।

महानगर पूर्वाधार विकास कार्यक्रम
आगामी आर्थिक बर्षमा ६ वटा पहाडी जिल्लामा साना सहरको विकासका लागि सम्भाव्यता अध्ययन गर्ने, प्रदेशमा तीन महानगर विकास गर्ने नीतिअनुरुप महानगर पुर्वाधार विकास कार्यक्रम संचालन गर्ने प्रदेश सरकारको तयारी छ ।

लुम्बिनी र राप्ती विशिष्टिकृत अस्पताल
आधारभूत शिक्षा र स्वास्थ्य जनताको अधिकारको नीतिअनुरुप शिक्षा र स्वास्थ क्षेत्रको विकासमा जोड दिने, बुटवलको लुम्बिनी र दाङको राप्ती प्रादेशिक अस्पताललाई विशिष्टिकृत र विशेषज्ञ सेवा प्रदान गर्ने, दाङ्गको लमहीमा आधुनिक ट्रमा सेन्टर स्थापना गर्ने प्रदेश सरकारको नीति छ ।प्रदेश मातहतका जिल्लास्तरका अस्पतालहरुलाई कम्तीमा ५० शय्याको अस्पतालको रुपमा स्तरोन्नति गर्दै लगिने र यी अस्पतालहरुमा दन्त सेवा, फिजियोथेरापी लगायतका आधारभूत सेवाहरु विस्तार गर्ने प्रदेश सरकारको नीति छ ।

जागृति युवा क्लबको भर्चुअल अधिबेशन, अध्यक्षमा केसी

मोहन न्यौपाने / जागृति युवा क्लब तिलोत्तमा-२ को १३ औ बार्षिक साधारण सभा तथा ६ औ अधिबेशनले बिदुर केसीको अध्यक्षतामा १५ सदस्यीय कार्यसमिति चयन गरेको छ । विश्वमा फैलिएको कोरोना संक्रमणका बीच लकडाउनमा अनलाइन भर्चुअल मार्फत पुर्व अध्यक्ष तथा सल्लाहकार गोविन्द भुसालको प्रमुख आतिथ्यतामा नयाँ कार्यसमिति चयन गरेको हो। क्लबका निबर्तमान अध्यक्ष अर्जुन प्रसाद पौडेलको कार्यकाल सकिएसंगै सो अधिबेशनले आगामी २ बर्षीय कार्यकालको लागि नयाँ कार्यसमिति चयन गरेको हो ।

जसको उपाध्यक्षमा भिम पौडेल, सचिब दिवस खनाल, सहसचिब सन्तोष तिवारी, कोशाध्यक्ष रामु खनाल र सदस्यहरुमा बर्षा रेग्मी, बिमल न्यौपाने, शिव पौडेल, रोजिन घिमिरे, अजय काफ्ले, आरती तिवारी, निशा पाण्डे, प्रशान्त पौडेल, बिबेक रेग्मी , पुजा पाण्डे लगायतका रहेका छन्। निर्बाचन समितिका संयोजक तथा प्रमुख अतिथि समेत रहेका गोबिन्द भुसालले आगामी कार्यकालका लागि आएका पदाधिकारीहरुलाई अनलाइन मार्फत सपथ खुवाएका थिए।

भर्चुअलमा सहभागीहरुले क्लबले गरेको सामाजिक कार्यप्रतिको प्रशंशा र आगामी कार्यकालको लागि चयन भएका सबै कार्यसमितिलाई बधाई तथा शुभकामना दिदै क्लबको प्रगतिको कामना गरेका थिए । क्लबमा स्थानिय युवाहरु आफनो कामसंगै सामाजिक हितमा अग्रसर भएर निरन्तर लागेका छन ।

तिलोत्तमा प्रवेश नाकामा शंकरनगर खानेपानीद्वारा सेनिटाईज प्रविधी,गाडीआएको सेन्सरबाट थाहा

शंकरनगर खानेपानी तथा सरसफाई उपभोक्ता संस्था योगिकुटीले बुटवलबाट तिलोत्तमा नगरपालिका प्रवेश गर्ने योगिकुटी चोकमै अटोमेटिक सेनिटाईजर स्प्रे टनेल जडान गरेको छ । सडकमा सन्चालन हुने गाडीलाई ६ लेन सडकमै सेनिटाईज गर्ने प्रविधी सहितको स्प्रे टनेल जडान गरिएको हो | स्प्रे मेसिनमा जडान गरिएको सेन्सरले सडकमा गाडी आएको थाहा पाउने र मेसिनमार्फत अटोमेटिक स्प्रे गर्दछ |

मेसिन सडकमा यसअघि नै राखिएको प्रवेशद्धारमाथी जडान गरिएको छ भने सेन्सरले गाडी आएको थाहा पाएपछि सडकतर्फ स्प्रे गर्ने छ । स्प्रेको लागि सडकमाथी १२ वटा नोजल राखिएको र त्यहि नोजल मार्फत स्प्रे हुने छ । मेसिन जडान गरिएको १५ मिटरको दुरीमै गाडी आएपछि सेन्सरले थाहा पाउने र ३० सेकेन्डसम्म स्प्रे मार्फत सडकमा गुडिरहेको गाडी सेनिटाईज गर्ने सस्थाका कार्यलय प्रमुख ईञ्जिनियर दिपक पाण्डेले जान्कारी दिएका छन ।

सडकमा गुड्ने गाडीको गति नियन्त्रण गर्न सो क्षेत्रमा बेरिकेट राखिएको र सडकको छेउमा एकहजार लिटर क्षमताको ट्यांकी जडान गरिएको छ । ट्यांकीमा लिक्विड क्लोरिन राखेपछि सेन्सरको माध्यमबाट चल्ने मोटरले तानेर गाडी स्प्रे गर्ने ईञ्जिनियर पाण्डेले जानकारी दिए ।

संस्थाका अध्यक्ष हरि तिवारीले तिलोत्तमा नगरपालिका क्षेत्र भित्र प्रवेश गर्ने सवारी साधन र यात्रुलाई सुरक्षित बनाउन संस्थाले स्प्रे टनेल जडान गरेको बताए । नगरपालिकाको उत्तरतर्फको प्रवेशद्धारमा राखिएको स्प्रे टनेलको सफल परिक्षणसंगै दक्षिणतर्फको प्रवेशद्धार कोटिहवामा नगरपालिका आफैले लगानी गरेर मेसिन जडान गरिने नगरप्रमुख बासुदेव घिमिरेले जानकारी दिएका छन।

सामुदायिक रेडियो, रेडियो लुम्बिनी मार्फत एसइईको पुनर्ताजगी कक्षा

मोहन न्यौपाने, तिलोत्तमा बैशाख ७,तिलोत्तमा । कोरोना भाइरसका कारण माध्यमिक शिक्षा परीक्षा (एसइई) स्थगन भएपछि त्यसको तयारीमा रहेका विद्यार्थी मर्कामा परेको भन्दै जिल्लाको बरेङ तिलोत्तमा नगरपालिकाले स्थानीय सामुदायिक रेडियोबाट कक्षा सञ्चालन थालेको छ । लकडाउन खुल्ने बित्तिकै परीक्षा तालिका सार्वजनिक गर्ने शिक्षा मन्त्रालयको तयारीलाई मध्यनजर गर्दै नगरपालिकाले रेडियोमार्फत विद्यार्थीलाई अनलाइन तयारि कक्षा सञ्चालन गरेको हो । तयारीमा रहेका विद्यार्थीले लामो समय बिदामा बस्दा सिकेका कुरासमेत बिर्सिने र परीक्षामा समस्या आउने भएकाले रेडियोमार्फत पुनर्ताजगी कक्षा सञ्चालन गरिएको तिलोत्तमा नगरपालिकाका प्रमुख प्रशासकीय अधिकृत माधव प्रसाद शर्माले बताए ।

१० दिन देखि रुपन्देहीको तिलोत्तमा नगरपालिका मणिग्राममा रहेको सामुदायिक रेडियो रेडियो लुम्बिनी ९६.८ बाटदिउसो १ बजेदेखि साँझ ६ बजेसम्म ६ विषयको कक्षा सञ्चालन भैरहेको प्रमुख प्रशासकीय अधिकृत शर्माले बताए । कक्षा सञ्चालनका लागि विषय शिक्षकले तिलोत्तमा नगरपालिकाको आफ्नै प्रबिधि स्टुडियो विद्यार्थीलाई जुम एप्लिकेशनमा लाइभ, आफ्नो युटुब पेज, फेसबुक पेज, र उपत्यका बाहिरको पहिलो सामुदायिक रेडियो रेडियो लुम्बिनी मार्फत जानकारीहरु प्रदान गर्ने र विद्यार्थीले सामाजिक सञ्जाल वा लाइभ मार्फत जिज्ञासा राख्न सक्ने व्यवस्था मिलाइएको शर्माले बताए ।

‘एसइईलाई लक्षित कक्षा सञ्चालन भएको छ, परीक्षाको तयारी गराउँदा जसरी विद्यालयमा शिक्षकले पढाउँथे उसैगरी अनलाइन र रेडियोबाट पढाइ हुन्छ,’ शर्माले भने, ‘यसले विद्यार्थीलाई धेरै सहज बनाउने छ, नसिकेका कुरा सिक्ने र बिर्सेका कुरा सम्झने अवसर हुनेछ ।’ अङ्ग्रेजी, गणित, विज्ञान र सामाजिक शिक्षा, नेपाली र कम्प्युटर बिज्ञान विषयको कक्षा रेडियोबाट सञ्चालन भैरहेको छ ।

अनलाइन र रेडियोमार्फत कक्षा सञ्चालन गर्ने शिक्षकका लागि नगरपालिकाले लकडाउनमा पनि नगरपालिका स्टुडियोसम्म आउने जाने ब्यबस्था गरेको छ । विद्यालय खोल्न वा ट्युसन, कोचिङ कक्षा सञ्चालन गर्न सम्भव नरहेकाले अनलाइनसंगै रेडियोको विकल्प खोजिएको शर्माले बताए । इन्टरनेटको सुबिधा भएकाले अनलाइनबाट र सम्भव नभएकाले रेडियोबाटै प्रदेश ५ का सबै जिल्ला सहित १५ जिल्ला भरि सुनेर अधिकांश विद्यार्थीले लाभ लिन सक्ने नगरपालिकाका सूचना तथा प्रबिधि अधिकृत इन्जिनियर सुदिप ढकालले बताए। परीक्षा तयारी कक्षा नै सञ्चालन हुने भएकाले विद्यार्थीका लागि उपयोगी हुने ढकालको दाबी छ । नगरपालिकाले विद्यार्थीलाई लकडाउनको पूर्ण पालना गर्दै प्रविधिको प्रयोगमार्फत एसइईको तयारीलाई जारी राख्न नगरपालिकाले अनुरोध समेत गरेको छ ।

कोरोना भाइरस: निको हुन कति समय लाग्छ

जेम्स ग्यालहर

कोभिड-१९ रोग सन् २०१९ को अन्त्यतिर देखा परेको हो। तर कतिपय बिरामीहरूलाई यसबाट पूर्णतया निको हुन लामो समय लाग्ने देखिएको छ।निको हुने समय तपाईँ कति धेरै बिरामी हुनुभएको छ भन्नेमा निर्भर गर्छ।केही मानिसहरू चाँडै नै निको भइहाल्छन् भने अन्यलाई यसले दीर्घकालीन असर छाड्न सक्छ।उमेर, लिङ्ग तथा अन्य स्वास्थ्य समस्याजस्ता विषय जोखिम तत्व हुन् जसले कोभिड-१९ बाट को कति गम्भीर बिरामी हुन्छ भन्ने निर्क्योल गर्छ।

सामान्य लक्षणमात्र देखा परेको खण्डमा के हुन्छ?
अधिकांश कोभिड-१९ का बिरामीलाई केवल मुख्य लक्षण देखापर्छन् – खोकी र ज्वरो। उनीहरूलाई जीउ दुख्ने, थकाइ लाग्ने, घाँटी तथा टाउको दुख्ने हुन सक्छ।सुरुमा सुक्खा खोकी र पछि खकार सहितको खोकी लाग्न सक्छ।यी लक्षणलाई आराम, प्रशस्त पानी पिउने तथा दुखाइ कम गर्न प्यारासिटामोलको प्रयोग गर्ने गरे पुग्छ।

यस्ता सामान्य लक्षण भएका बिरामीहरू छिटो र पूर्ण निको हुनसक्छन्।
ज्वरो एक हप्तामा ठीक हुनसक्छ भने खोकी केही थप समय जारी रहन्छ।
चिनियाँ आँकडाका आधारमा विश्व स्वास्थ्य सङ्गठन (डब्लु एच ओ)ले औसतमा दुई सातामा बिरामी निको हुने जनाएको छ।

यदि गम्भीर लक्षण भएमा के हुन्छ?
कतिपयको निम्ति यो रोग निकै गम्भीर बन्न सक्छ। सङ्क्रमण भएको सातदेखि १० दिनमा यस्तो हुन सक्छ।यो परिवर्तन निकै तीव्र गतिमा हुनसक्छ। सास फेर्न गार्‍हो हुन थाल्छ अनि फोक्सो सुन्निन्छ।यस्तो किन हुन्छ भने शरीरको प्रतिरोध प्रणालीले भाइरससँग लड्न खोज्दा अत्यधिक प्रतिक्रिया जनाउँछ जसले गर्दा शरीरमा अन्य जटिलता उत्पन्न हुन्छ।केही मानिसलाई अक्सिजनका लागि अस्पतालमा राख्नुपर्ने हुनसक्छ।एकजना चिकित्सक सेरा जार्भिस भन्छिन्, “सास फेर्न गार्‍हो हुने अवस्था निको हुन निकै समय लाग्छ किनकी शरीरमा निकै सुजन भएका हुन्छन्।”यसबाट निको हुन दुईदेखि आठ हप्ता लाग्न सक्छ। लामो समयसम्म जीउमा थकान रहिरहन्छ।

सघन उपचारको खाँचो परेमा चाहिँ के हुन्छ?
डब्लुएचओको अनुमानमा प्रत्येक २० मध्ये एकजनालाई सघन उपचारको खाँचो पर्न सक्छ। त्यसमा भेन्टिलेटरमा राख्नपर्ने बिरामी पनि पर्छन्।सघन उपचार केन्द्र (आइसीयू) मा राखेपछि निको हुन थप समय लाग्छ। घर पठाउनु अघि सामान्य वार्डमा सारिन्छ। सघन उपचारमा रहनु परेको बिरामीलाई पूर्णत: तन्दुरुस्त हुन १२ देखि १८ महिना लाग्ने इन्टेन्सिभ केअर मेडिसिन विभागकी डिन डा. एलिसन पिटार्डले बताइन्।लामो समय अस्पतालमा बस्दा तौल घट्छ। मानिस कमजोर हुन्छ अनि मांसपेशीहरू तन्दुरुस्त हुन समय लाग्छ। कतिलाई हिँडडुल गर्न फिजियोथेरापी आवश्यक पर्न सक्छ।चीन र इटलीबाट प्राप्त विवरणहरूमा बिरामीहरूलाई कमजोरी अनुभव भएको, थोरै हलचल गर्दापनि स्वाँस्वाँ आउने भएको अनि खोकी लागिरहेको उल्लेख छ। धेरै निद्राको आवश्यकता परेको पनि देखिएको छ।”हामीलाई थाहा छ बिरामीहरूलाई लामो समय, कतिपयलाई महिनौँ, लाग्न सक्छ,” कार्डिफ तथा भेल विश्वविद्यालयको स्वास्थ्य बोर्डका फिजियोथेरापिस्ट पाउल टोजले बताए।तर यसलाई सामान्यीकरण गर्न कठिन हुन्छ। कुनै मानिस सघन उपचार कक्षमा थोरै समयमात्र रहन्छन् भने कसैलाई हप्तौँसम्म भेन्टिलेटरमा राख्नुपर्छ।

के कोरोनाभाइरसले दीर्घकालीन असर पार्छ?
लामो समयसम्मका आँकडाहरू उपलब्ध नभएकाले यसबारे भन्न सकिँदैन।तर मिल्दाजुल्दा अन्य अवस्थासँग दाँज्न भने सकिन्छ।शरीरको प्रतिरोधी प्रणाली अधिक सक्रिय भएर फोक्सोमा खराबी उत्पन्न भएका बिरामीहरूमा स्वासप्रस्वाससम्बन्धी एक्युट रेस्पिरेटरी डिस्ट्रेस सिन्ड्रम वा आर्ड्स भन्ने अवस्थाको विकास हुन्छ।”त्यस्ता मानिसलाई पाँच वर्षपश्चात् पनि शारीरिक वा मनोवैज्ञानिक कठिनाइ उत्पन्न हुने गरेको आँकडाहरू उपलब्ध छन्,” टोजले भने।भेन्टिलेटरमा राख्नुपर्ने बिरामीहरूलाई निको भएपछि पनि गहिरो मानसिक आघात परेको हुनसक्छ।सामान्य समस्यामात्र बेहोरेका बिरामीलाई पनि लामै समयसम्म थकान भइरहन सक्छ।

कति मानिस निको भइसके?
यकिन आँकडा मिल्न गार्‍हो छ।जोन्स हप्किन्स विश्वविद्यालयको विवरण अनुसार एप्रिल १७ (यो समाचार प्रकाशित हुदासम्म ) सम्ममा २० लाख ६३ हजार सङ्क्रमित मध्ये करिब पाँच लाख ८० हजार मानिस निको भइसकेका छन्।तर विभिन्न देशहरूले विभिन्न किसिमको रेकर्ड राख्ने प्रणाली अपनाएका हुन्छन्। कतिपयले निको भएका आँकडा प्रकाशित गर्दैनन् अनि कैयन् सामान्य सङ्क्रमणका विवरण उल्लेख गरिँदैनन्। गणितको प्रयोग गरेर निर्मित मोडेलहरूअनुसार ९९ देखि ९९.५% मानिस निको हुने अनुमान छ।

के दोहोर्‍याएर कोभिड-१९ हुन्छ?
यसबारे पनि चर्चा धेरै तर प्रमाण कम छ। कोही मानिस सङ्क्रमित भए उसको शरीरमा विकास हुने प्रतिरोधी क्षमता कत्तिको दिगो हुन्छ भन्ने यकीन छैन। यदि कसैले सफलतापूर्वक भाइरसलाई हराएको छ भने उसको शरीरमा पक्कै पनि त्यसको प्रतिरोधी क्षमता विकास भएको हुनुपर्छ। एउटै बिरामी दोहोर्‍याएर सङ्क्रमित भएका भन्ने जस्ता विवरणको मूल कारण अघिल्ला परीक्षणमा गल्तीले सङ्क्रमणमुक्त भएको देखिएको हुनसक्छ। प्रतिरोधी क्षमताको विषयले नै कतै मानिस पुन:सङ्क्रमित हुनसक्छन् वा यसविरुद्धको खोप कत्तिको प्रभावकारी हुनसक्छ भन्ने निर्क्योल गर्न सघाउनेछ।

उदयपुरमा लुकेर बसेका ८ भारतीय नागरिकमा कोरोना पोजेटिभ

Positive blood test result for the new rapidly spreading Coronavirus, originating in Wuhan, China

उदयपुर : उदयपुरको मस्जिदमा लुकेर बसेका ८ भारतीय नागरिकमा कोरोना पोजेटिभ भेटिएको छ। त्रियुगा नगरपालिका ३ भुल्केस्थित मस्जिदमा लुकेर बसेका १० मध्ये ८ जनाको स्वाब परीक्षण गर्दा कोरोना पोजेटिभ पाइएको हो। भुल्केस्थित मस्जिदमा लुकेर केही भारतीय नागरिक बसेको सूचना आएपछि मंगलबार सुरक्षाकर्मीसहित मस्जिद पुगेको स्वस्थ्यकर्मीको टोलीले उनीहरुको स्वाब नमुना लिएको थियो।

उनीहरुको स्वाब परीक्षणका लागि कोशी अस्पताल विराटनगर ल्याइएको थियो। सबैको रिपोर्ट पोजेटिभ भेटिएको र रिपोर्ट मुख्यमन्त्री कार्यालय सँगै केन्द्रमा पठाएको प्रदेश १ को सामाजिक विकास मन्त्रालय स्रोतले जानकारी दिएको छ। क्रमश:स्रोत अन्नपूर्ण पोस्ट

आँखाका रोगीहरुको गाडीबाटै उपचार दिदै नेत्र चिकित्सक डा.अमित

रुपन्देहीको तिलोत्तमा नगरपालिका स्थित मणिग्राममा आफ्नो सेवा प्रदान गर्दै आएका लुम्बिनी आँखा उपचार केन्द्रका नेत्र तथा दृस्टी विशेषज्ञ डाक्टर अमित के.सी.ले इमर्जेन्सी सेवा आफ्नै गाडीबाटै घरघरमा दिदै आएका छन् । कोरोनाको भयाबह अवस्था विश्वभर फैलिरहेको आवस्थामा घरमै हुन सक्ने आँखा सम्बन्धि समस्या र दुर्घटनाबाट बच्न डा.केसीले घरघरमै उपचार दिने बताएका हुन् । हाल दैनिक ५ देखि १० जनाको उपचार गरिरहेका उनले लकडाउनमा हिड्न समस्या रहेको र इमर्जेन्सी अवस्थामा घरमै गएर निशुल्क उपचार दिने बताएका छन् । लकडाउनको २० दिनसम्म निशुल्क औषधि समेत दिदै आएका डा के.सी.ले उपचार परामर्श निशुल्क हुने र औसधि नभएको अवस्थामा बिरामीले खरिद गर्नुपर्ने बताए।आफुलाई अत्यावश्यक परेको आँखाको औसधि पाउदा एक सेवाग्राही प्रविन बन्जाडे खुसि हुदै यो अवस्थामा पनि डक्टरले दिनुभएको सेवाका लागि धन्यबाद समेत ब्यक्त गरेका थिए । त्यस्तै आफुलाई आवश्यक परेको चस्मा , सनग्लास , औषधि , परामर्श र इमर्जेन्सी अवस्थामा शल्यक्रिया समेत गरिने डाक्टर अमित के.सी.ले बताए ।

विश्वभर फैलिएको कोरोना भाइरस कोभिड १९ ले माहामारीको रुप लिएपछि नगरपालिका भित्रका गाउँ गाउँमा पुगेर डक्टर सहितको टिमले उपचार गरिहेको उनले वताएका छन् । अहिले घरमा बसेर लकडाउन पालनागरि खेत बारीमा काम गरेका घर परिवारहरु सचेत हुनुपर्ने र कथमकदाचित आँखामा केहि समस्या आएमा आफुलाई सिधै हटलाइन मार्फत ९८५७०३५७६५ मा समेत फोन गरेर परामर्श लिन र इमर्जेन्सी अवस्थामा उपचारको लागि घरमै बोलाउन समेत आग्रह गरेका छन् ।

अनलाइनबाटै एसईई विद्यार्थीलाई गज्जबको कक्षा संचालन गर्दै तिलोत्तमा

२९ चैत्र २०७६,
तिलोत्तमा/ लकडाउनको कारण विद्यार्थीहरु विद्यालय जान—आउन नसक्ने भएपछि रुपन्देहीको तिलोत्तमा नगरपालिकाले चित्र 28 गतेदेखि अनलाइन कक्षा सञ्चालन गरेको छ । एसइईको तयारीमा रहेका विद्यार्थीहरुलाई लक्षित गरी नगरपालिकाले शुक्रबारबाट अनलाइन कक्षा सुरु गरेको शिक्षा शाखा प्रमुख गंगाराम आचार्यले बताउनुभयो ।

विषयविज्ञ शिक्षकहरुले हरेक दिन दिउँसो १ बजेदेखि साँझ ६ बजेसम्म अनलाइन कक्षामार्फत् विद्यार्थीलाई पढाउने व्यवस्था मिलाइएको छ । शान्ति नमूना माविबाट शिक्षकहरुले अंग्रेजी, गणित, नेपाली, सामाजिक, विज्ञान र कम्प्युटर विषय अनलाइनमार्फत् पढाउने शिक्षा शाखा प्रमुख आचार्यले बताउनुभयो ।

विद्यार्थीले आ—आफ्नो घरबाटैं मोबाइल एप जुम zoom तिलोत्तमा नगरपालिकाको फेसबुक पेज वा युट्युवबाट शिक्षकले पढाएको विषयबस्तुको बारेमा ज्ञान लिन सक्नेछन् । अनलाइन कक्षामा बढीमा ४० जनासम्मले प्रश्नोत्तर समेत गर्न सक्ने व्यवस्था मिलाइएको छ ।अनलाइन कक्षाको सुभारम्भ गर्दै नगर प्रमुख बासुदेव घिमिरेले कोरोना महामारीको समयमा सूचनाप्रविधिको माध्यमबाट विद्यार्थीले घरमैं बसेर पाठ्यबस्तु अध्ययनमा सघाउ पुर्याउन अनलाइन कक्षा सञ्चालन गरिएको बताउनुभयो ।

अनलाइन कक्षाबाट बढीभन्दा बढी लाभ उठाउन विद्यार्थी र अभिभावकहरुलाई आग्रह गर्दै नगर प्रमुख घिमिरेले लकडाउनको समयमा विद्यार्थीहरु अनावश्यक रुपमा घरबाहिर निस्कने प्रवृत्तिलाई रोक्न पनि यो केही हदसम्म फलदायी हुने विश्वास व्यक्त गर्नुभयो । अनलाइन कक्षा सञ्चालनका लागि एपमार्फत विद्यार्थीलाई जोडेर पढाइने गरिएको छ । एपको मिटिङ्ग आईडी ५३५४०५९६०८ र पासवर्ड १२३४५ रहेको छ ।

तिलोत्तमाका ५१ वटा सामुदायिक तथा संस्थागत विद्यालयका झण्डै २७ सय विद्यार्थी एसइईको तयारीमा छन् । कोरोनाको कारण एसइई सुरु हुने दिनको अघिल्लो साँझ सरकारले अर्को सूचना जारी नहुँदासम्मको लागि परीक्षा स्थगित गरेको थियो ।

नवज्योतिले बाड्यो नगरपालिकाको समन्वयमा बिपन्न राहत

मोहन न्यौपाने,तिलोत्तमा सिटी चैत्र २४। लकडाउनको कारण रोजी रोटी गुमेका तिलोत्तमा नगरपालिका वडा नं. २ का ११७ परिवारलाई बिपन्न राहत वितरण गरीएको छ । स्थानिय नवज्योति क्लबले स्थानिय स्तरमा सहयोग स्वरुप उठाएको राहत तथा सहयोगलाई तिलोत्तमा नगरपालिकाको समन्वयमा स्थानीय तथा बहालमा बसेका बिपन्न परिवारहरुलाई राहत वितरण गरिएको अध्यक्ष दिपेश कंडेलले बताउनुभयो।तिलोत्तमा नगरपालिका तथा वडा नं.-२ का जनप्रतिनीधि एवं टोल बिकास संस्थासंगकाे सहकार्यमा आफ्नो वार्ड का करिब १सय ७७ घरधुरीमा बसोबास गर्नेहरुको विवरण टिपेर दुरू मापन गरि समयानुसार राहत वितरण गरिएको अध्यक्ष कंडेलले बताउनुभयो । राहतमा चामल १० के.जी.,दाल २ के.जी,तेलआधा लि.र नुन १ के.जी.राखी वितरण गरिएको थियो । क्लबले तिलोत्तमा वडा न.२का त्रिशक्ति पशुपति टोल बिकास संस्थाका १६ परीवार, जागृति टोल बिकास संस्थाका १२ परीवार,संसारीमाई टोल बिकास संस्थाका ७ परीवार,सिद्देश्वर टोल बिकास संस्थाका २६ परीवार,शिवालय टोल बिकास संस्थाका १८, मध्यबिन्दु टोल बिकास संस्थाका १२ परीवार,सगरमाथा टोल बिकास संस्थाका ८ परीवार,लक्ष्मी टोल बिकास संस्था १२ परीवार,मालिका टोल बिकास संस्था ६ परीवार गरि जम्मा १सय १७ परिवारलाइ राहत वितरण गरिएको हो । तिलोत्तमा स्थित दुर्गादत्त माविको प्राङ्गण र तपाह स्थित शिवालय मन्दिरमा वितरण गरिएको राहत लिन समय अनुसार दुरी मापन गरि कोरोना र लकडाउन लाइ मध्यनजर गरि बाडिएको थियो ।

क्लबले तिलोत्तमा वार्ड १ का राहत लिन छुटेका र नाम टिपाएका बिपन्न परिवारको लागि भोलि चैत्र २५ गते बिहान ८ बजे दुर्गादत्त मावि शारदास्कुलको प्रांगणमा क्लबमा संकलित राहत वितरण गर्ने कार्यक्रम रहेको अध्यक्ष दिपेश कंडेलले बताउनुभएको छ ।

तिलोत्तमा चेम्बर अफ कमर्शका घरधनीले भकाभक सटर भाडा छुट गर्दै

तिलोत्तमा, चैत्र १०/ विश्वभर महामारीको रुपमा फैलिएको कोभिड १९ को संक्रमणको जोखिमका व्यापार व्यवसाय बन्द भईरहेका बेला तिलोत्तमा चेम्बर अफ कमर्सका अध्यक्ष लगायत पदाधिकारी तथा सदस्यहरुले भाडामा लगाउंदै आएका सटरको भाडा नलिने निर्णय गरेका छन् । चेम्बर अफ कमर्सका अध्यक्ष झविन्द्र प्रसाद कंडेलले भाडामा लगाउंदै आएको आफ्ना ९ वटा व्यवसायीक सटरको चैत्र महिनाको भाडा मिनाहा गर्ने घोषणा गरेका छन् ।

त्यस्तै संस्थाका सचिव हरि प्रसाद उपाध्यायले पनि भाडामा लगाउंदै आएको १० वटा सटरको चैत्र महिनाको भाडा नलिने घोषणा गरेका छन् ।संस्थाका कोषाध्यक्ष नेत्र प्रसाद न्यौपाने र सदस्यहरु विष्णु कालिराज र तोलाकान्त भण्डारीले पनि एकमहिनाको घरभाडा छुट गर्ने बताएका छन् । चेम्बर अफ कमर्सले कोरोना जोखिमको कारण व्यापार व्यवसाय बन्द गर्नुपर्दा व्यवसायीहरुको आम्दानीको श्रोत नै बन्द भएकोले भाडामा लगाउंदै आएका सटरहरुको एकमहिनाको भएपनि भाडा मिनाहा गरिदिन घरधनीहरुलाई आग्रह गरेको छ । आज मणिग्राममा बसेको तिलोत्तमा चेम्बर अफ कमर्सको बैठकमा पदादिकारीहरुले सो निर्णय लिएका हुन् । आगामी दिनमा बजार बन्द गर्ने कि नगर्ने भनेर ब्यबसायिहरुले तिलोत्तमा नगरपालिकासंग समन्बय गरि अगाडी बढ्ने समेत बताएका छन् ।

RECENT POSTS